Сумар дня на 14. липця/юлия 2021 р.

Приносиме вам сумар медияльной ґрупы ЛЕМ.фм+ на ден 14. липця/юлия 2021 р.

Єст выконавця експресовой дорогы С19 (S19) медже Місцьом Пястовым а Дукльом

В 2025 році має быти готовый 10-кілометровый одтинок експресовой дорогы С19 (S19) медже Місцьом Пястовым а Дукльом. Запроєктує і збудує го фірма Старбаґ. В понедільок, 12. липця/юлия, торжественно підписали догваріня медже выконавцьом а представниками Ґенеральной Дирекциі Державных Доріг і Автострад. Вартіст догваріня то праві 479 млн зл. Є то уж осмый одтинок трасы Via Carpatia в підкарпатскым воєвідстві скєруваный до реализациі. Буде то тіж єден з найтяжшых з огляду на специфіку терену: форму, скомликувану ґеолоґічну будову, чысленны місця, де зсуват ся земля, ци бывшы копальні. Дорога буде мала по два пасы руху в обі страны. На обшыри Дуклі зроблят в будучности транспортове скрижуваня, якє получыт С19 (S19) з державном дорогом но 19, а пізнійше має быти до него влучена воєвідска дорога но 993 (Ґорлиці-Новый Змигород-Дукля).

Выстава о выселенецтві Словаків і Русинів

Крайскiй Музей в Пряшові і Касіґарда – Музей Еміґрациі з Териториі Словациі до Пілнічной Америкы приготовили во спілпрацы з Пряшівскым Університетом выставу пн. «Американьскій сон – Еміґрация зо Словациі до Пілнічной Америкы». Експозиция дає публиці можливіст познати штоденну реаліту жытя словацкого ци русиньского еміґранта в контексті його жытя, тяжкых або святочных моментів, котры пережывали нашы краяны за океаном. Выставу мож обзерати в Палаци Ракочых в Пряшові до кінця жолтня/октобра тр.

Не буде бывшой кавярні, буде інгалятория

Неодолга і Ґорлиці будут мати свою інгаляторию. В Містным Парку побудуют місце до дыханя здравотным повітрьом. Інгаляторию вознесут в місци бывшой кавярні «Паркова», котра хоц родит сентимент жытелів міста, то находит ся в барз планній технічній кондициі – треба єй просто розобрати. Роками не было заінтересуваня серед місцевых підприємців, жебы вести гын свій бізнес. Ґорлицка інгалятория буде мала форму вельокута вписаного в округ. Буде зроблена з дерева, посередині будинку поміщеный буде стоп з голузок тернины, по котрым сплывала буде солянка. Появлят ся новы лавкы і перґолі. Проєкт є спілфінансуваный Малопольскым Воєвідством.

Даме раду спільні печатати книжку?

До кінця серпня/авґуста тр. тырват соспільна колекта на печатаня першой лемківской кухарской книжкы. Тото комплексове выдавництво буде поділене на 8 части, м.ін. будут «Стравы з капусты», «Молочны стравы» ци «Стравы з комперями». Разом представленых буде 70 провіреных ориґінальных рецептур, што сут оддзеркаліньом традицийной лемківской кухні. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl і причынити ся до печатаня публикациі, глядайте колекты під назвом: Łemkowskie smaki – wydanie książki kucharskiej. За ініциятиву одповідат Стоваришыня «Руска Бурса» в Ґорлицях.