Сумар дня на 14. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 14. квітня/апріля 2022 р.

Упамятніня 75. річниці Акциі «Вісла»

В 2022 р. споминаме на смутну, 75. річницю Акциі «Вісла». Хотячы упамятнити тоты подіі, в суботу – 30. квітня/апріля, зыйдеме ся в місцях, якы не лем символично – але і фактично – засвідчуют про траґедию нашых дідів, родичів і дальшых поколінь Лемків. Першым пунктом в проґрамі буде одданя чести жертвам лаґру працы в Явожні при лемківскым місци памяти. Подіі в Явожні заплянувано на 11.00 год. Місцьом, де тым разом прозвучыт великодня молитва за вшыткы жертвы выгнаня, буде церков св. Михала в неістнуючым по выселінях селі Білична. Тота част проґраму заплянувана є на 14.00 год. Пак зобраны переіхают до Устя Руского, де під славным памятником в центрі села зложене буде квітя. Тота част зачне ся о 15.00 год. Посліднім пунктом буде стріча, яка зачне ся о 17.00 год. в просторах ґорлицкой Руской Бурсы. До спільнотовых упамятнінь кличут вєдно Стоваришыня Лемків і Стоваришыня «Руска Бурса» в Ґорлицях.

Наша памят цілый рік

Подіі заплянуваны на 30. квітня/апріля то не конец упамятнінь 75. річниці выгнаня. Окрем спомненых центральных упамятнінь, річницьовы акценты являт ся і на дальшых лемківскых подіях, якы будут орґанізуваны нашыма обществами. Певністю споминовы акциі будут одбывати ся вчас ХІ Медженародного Бієнале Лемківской/Русиньской Культуры в Креници (20.-21. мая), а тіж на LXII Лемківскій Ватрі на Чужыні – в Михалові (5.-6. серпня/авґуста). Тогорічна ХХХ Лемківска Творча Осін (8.-9. жолтня/октобра), яка пройде в Білянці і в Рускій Бурсі в Ґорлицях, окрем споминів на Павла Стефановского (1932-2021), буде своім проґрамом упамятняла і выселіня з 1947 р. Приміром Петро Мурянка плянує взновити выданя книжкы «А Вісла дале плыне», яка явила ся на 60. річницю депортациі. Ведучый Стоваришыня Лемків і режысер, Андрий Копча уж тепер працує над реализацийом ІІІ части фабулярного фільму «Акция Вісла. Поворот».

Фестіваль «Ружова заградка»

Як інформує русиньска редакция порталю Радийо-Телевізия Войводины, 8. мая 2022 р. одбуде ся в Новым Саді 32. річник фестівалю новой русиньской співанкы під назввом «Ружова заградка». Фестіваль тот рік буде проходил на сцені Сербского Нацийонального Театру в Новым Саді. Орґанізатором подіі є Радийо-Телевізия Войводины (РТВ), котра уж веце як тридцет років плекат традицию і культуру Русинів. Того рока буде на фестівали представленых 15 новых композиций, а інтерпретаторам будут акомпаніювати дві оркєстры. За словами редакторкы фестівалу Златиці Няряди «Ружова заградка» каждый рік приносит новы мелодиі русиньской співанкы, але і сохранят русиньскы традициі і культуру. Жырі выбере три найліпшы композициі.

Роботы на теметові в Чырній

Початком марця ґрупа лемківскых волонтерів вела при зимовій аурі роботы на памятковым цмонтері в Чырній. Проведены працы были ведены в рамках рыхтувань до дальшых камінярскых варштатів, якы плянує ся зорґанізувати в другій половині текучого рока. Припомнийме, што ґрупа лемківскых волонтерів до той поры выремонтувала єден з найбільшых нашых цмонтерів на західній Лемковині – в Лабовій. Про деталі дальшых стріч будеме іщы інформувати.