Сумар дня на 14. червця/юнія 2024 р.

Приносиме вам сумар медияльной ґрупы ЛЕМ.фм+ на ден 14. червця/юнія 2024 р.

Унікальный напрям з лемківскым языком на Ягайлоньскым Університеті

Інститут Східньославяньской Філолоґіі Ягайлоньского Універистету просит кандидаткы і кандидатів на унікатовы студиі на напрямі: «карпатскій реґіон: етнолінґвістика і культуровы студиі» на Ягайлоньскым Університеті. Напрям тот єст інтердисциплінарный, веденый штырьома Інститутами: Східньославяньской Філологіі, Славяньской Філолоґіі, Реліґійознавства та Етнолоґіі і Культуровой Антрополоґіі. Студенты будут познавати культурове і достоменностьове зріжницюваня Карпат, тіж в рамках тереновых досліджынь. Єдным зо штырьох языків до выбору, котрых мож ся буде вчыти в рамках студий, єст лемківскій язык. Студенты будут мочы познати основы лемківского языка, русиньску культуру і історию. Проґрам як єдиный в Польщы на тот час має в оферті модулы посвячены лемківскій культурі.

Православны Лемкы спомнули свв. Мучеників Холмскых і Підляшскых в Святковій Великій

В суботу 9. червця/юнія на граници сел Святкова Велика і Розстайне, на поляні при придорожній капличці, служена была св. Літургія, котру очелювал архієпископ перемышльско-ґорлицкій Паісий в асисті духовенства ґорлицкого, креницкого і саноцкого деканатів. Што рока зберают ся там православны вірны, жебы локальні спомнути на св. Мучеників Холмскых і Підляшскых, особливі о. мученика Павла (Швайко) і мученицю імость Йоанну, його жену. Перед тым, як трафили на Холмщыну, несли они послугу православным вірным на Лемковині. То при тій самій капличці, коло поляны, при котрій молили ся вірны в минулу суботу, св. Павел Швайко правил богослужыня в меджевоєнным періоді для православных Лемків.

Грекокатолицкє поломництво на Гору Явір

Рушыли записы на тогорічне грекокатолицкє поломництво в місце обявліня Богородиці на святій Горі Явір. Записы потырвают до неділі 7. липця/юлия. Поломництво зачне ся в віторок 16. липця/юлия і потырват штырі дни. Зачне ся оно св. Літургійом в грекокатолицкій церкви в Розділю. Пак поломникы підут через Ропицю Выжню, Маластів, Прислоп, Новицю, Ліщыны, Кункову, Устя Рускє, Квятон і Ганчову. Посліднього дня поломництва, в пятницю 19. липця/юлия придут до Высовой і выйдут на святу Гору Явір. О год. 9:30 буде там служеный молебен до Пресвятой Богородиці, а о 10.00 год. Понтифікальна Літургія з процесийом вколо каплиці.

«Лемківскє Літо» 2024

Припоминаме, што уж заран, в суботу 15. червця/юнія одбуде ся в Чмели на Нижнім Шлеску дальша едиция подіі пн. «Лемківскє Літо» – Дни Лемківской Культуры. Як все, одбуде ся она на рекреацийно-спортовым пляци в Чмели. Зачне ся о 14.00 год. Проґрам обнимат выступы ансамблів, в тым році почуєме м.ін. ансамблі: Ластівочка, н’лем фольк, Файна Ферайна, Розтока ци Ехо. Окрем того буде мож покоштувати традицийны лемківскы стравы зрыхтуваны місцевыма ґаздынями. Проґрам обнимат тіж рецитаторскы і вокально-танцювальны выступы діти і молодежы, плястичный конкурс, як і спортовы гры і забавы з нагородами. В пляні є і орґанізация футбольового і волейбольового мечів. Буде огниско і ярмак народного ремесла. Орґанізатором подіі єст православна парохія св. Тройці в Любіні.