Сумар дня на 14. червця/юнія 2021 р.

Приносиме вам сумар медияльной ґрупы ЛЕМ.фм+ на ден 14. червця/юнія 2021 р.

Схвалили Справу о поставліню і правах членів нацийональных меншын за рокы 2019-2020

Словацкы власти в середу, 9. червця/юнія, схвалили Справу о поставліню і правах членів нацийональных меншын за рокы 2019-2020. Документ оцінюючый дворічный період предложыл полномічный влады Словацкой Республикы про нацийональны меншыны Ласло Буковскій. За порядком уж семе оцініня, котре сумаризує дотеперішній розвиток в окремых обшырях дотримуваня прав членів нацийональных меншын, вказує обшыри, де дошло до проґресу, але і тоты, де остали недостаткы, обнимат і рекомендациі на зліпшыня ситуациі. З єдной стороны документ припоминат о преложыню Проґрамового выголошыня власти першый раз і до меншынового языка (мадярского). З другой, вказує на брак політичной партиі, яка бы в Нацийональні Раді СР репрезентувала інтересы нацийональных меншын. Оцініня вказує і на реґрес в обшыри інституцийонального забезпечыня меншыновой культуры і потребу выпрацувати жупами стратеґіі охороны і розвитку меншыновой культуры, в якых творіню бы брали участ представникы меншын. Веце позитивных змін видно в шкільництві, примірово розшыріня права про покрываня коштів транспорту учеників до найблизшой школы з навчальным языком нацийональной меншыны. Звернули увагу і на недостаток фінансовых середків і потребу освіты про урядників. Більше о документі чытайте на нашым портали.

В Креници підписали догваріня на орґанізацию Европейского Бігового Фестівалю

В пятницю, 11. червця/юнія, маршалок малопольского воєвідства Вітольд Козловскій, директор Департаменту Спорту і Европейскых Ігр Маршалківского Уряду Сильвія Шмыґа і Славомир Конопка, председа Фундациі На Ратунок, підписали в креницкій пияльни догваріня на орґанізацию Европейского Бігового Фестівалю. Як підкрислил маршалок Козловскій, єст то догваріня не лем на тогорічный фестіваль, але і на наступны едициі. Тогорічны змаганя сут заплянуваны на дни од 3. до 5. вересня/септембра. Будут короткы бігы для наймолодшых та дистансы долгости од 10 до 100 км. Найліпшых бігаючых мают до Крениці притягнути м.ін. атракцийны нагороды. Найскорша жена і найскоршый мужчына в бігу на 100 км отримают по 100 тис. злотых нагороды. Партнерами подіі окрем Маршалківского Уряду сут місто Крениця та Курорт Крениця-Жеґєстів.

Варштаты «Карпатского ремесла» в Команчы

Як поінформувал на своім фейсбуковым фанпейджы Ґмінный Осередок Культуры в Команчы, неодолга рушают з реализацийом вакацийного проєкту для діти і молодежы «Карпатскє ремесло». В проґрамі находят ся варштаты писаня ікон, керамікы, гончарства і пацюрковой біжутериі та выстава і підсумуваня проєкту. Дофінансуваня з середків Міністра Культуры, Нацийональной Спадковины і Спорту в высокости 13 тис. злотых было позыскане Директорком Ґмінного Осередка Культуры Кристином Ґалик-Гаргай. Проєкт буде реализуваный во спілпрацы з Основном Школом в Репеди. Неодолга будут оголошены наборы на варштаты.

Рослинны варштаты в Маґурскым Нацийональным Парку

Маґурскій Нацийональный Парк просит на рослинны варштаты. Стрічы одбудут ся 19. і 20. червця/юнія в штырьох ріжных місцевостях, в близкій околици Парку. В суботу, 19. червця/юнія, о 10.00 год. в Мшані пройдут варштаты про «Натуральны кадила». Пак о год 18.00 в Осєку Ясельскым і о ден о 10.00 год. в Здройовым Парку в Вапенным одбуде ся «Етноботанічна прогулька». Послідні варштаты будут тыкати «Напитків з дикых рослин» і пройдут в неділю, 20. червця/юнія, о 14.00 год. в Крампній. Більше про проєкт можете чытати на фейсбуковым профіли Маґурского Нацийонального Парку.