Сумар дня на 13. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 12. жолтня/октобра 2021 р.

ХХІХ едиция стріч творців лемківской літературы уж тот вікенд

Митрополиті Йосифови Сембратовичови, в 200. річницю народжыня, буде посвячена найблизша Лемківска Творча Осін. ХХІХ едиция стріч творців лемківской літературы пройде уж в тот вікенд – 16. і 17. жолтня/октобра, в двох місцях – в Креници, і традицийно, в Рускій Бурсі в Ґорлицях. В проґрамі є м.ін. доповід про митрополиту галицкого і архієпископа львівского Йосифа Сембратовича, одданого народови і Церкви Русина, котрый остатні рокы свойого жытя провюл на выгнаню в Римі. Про його особу бесідувати будут др габ. Олена Дуць-Файфер та Петро Мурянка, котрый розповіст іщы про поету Івана Горощака в 30. річницю його смерти, автора м.ін. обшырного тритомового твору «Прощай моя Лемковино». В дальшій части Осени запрезентуют ся творці русиньского писаного слова, як і тоты, котры пропаґуют лемківску літературну творчіст в чужых языках. На конец з концертом выступит Сусанна Яра в акомпаніяменті контрабасисты і перкусисткы. Початок стрічы в Креници в Музею Никыфора в суботу о 18.00 год., а в неділю в Рускій Бурсі о 15.00 год.

Каждый буде знал, на што смотрит

На видоковых вежах в Чорноріках і на Церговій заінсталювали новы атракциі – то пляншы з фотоґрафічном панорамом Карпат і люнета. Туристы не мусят уж згадувати, якы верхы видно докола, можут схоснувати практичне опрацуваня, котре все доступне є на плятформі. Сут то великы інформацийны таблиці, на котрых помістили фотоґрафічну панораму Карпат з описами – названями гір, іх высокістю і орієнтацийном одлеглістю од вежы. При одповідній погоді з Чорнорік видно тіж Татры і Бєщады. На видоковій вежы на Церговій замонтували панорамічну люнету, котру мож хоснувати дармо. Ґміна купила єй в рамках реализациі польско-словацкого проєкту «Дукля-Свидник 360 градусів». Вежа на Церговій доступна є цілый рік.

Посвятили новый крест в селі

В минулу неділю жытелі Ґожеліна, серед котрых сут і Лемкы, невеликого села в Ґміні Любін, попращали літо. Головном частю подіі было екуменічне посвячыня креста поставленого соспільном роботом на місци попереднього. В посвячыню взяло участ трьох священників: о. Богдан Оґродник з Грекокатолицкой Церкви, о. Єжы Ґансель з Євангелицко-Ауґсбуржского Костела та римокатолицкій священник о. Станіслав Бухта. Присутный на подіі війт ґміны Любін Тадеуш Кєлян повіл, што посвяченый крест єст символом вельоконфесийной спільноты. По посвячыню жытелі перенесли ся на спортове боіско, де перше вызвучал концерт Молодіжной Дутой Оркєстры Ґміны Любін, а пак была спільна гостина.

В Польковицях мают місце до здорового дыханя

Закінчыли будувати солянкову інгаляторию в Центральным Парку Забав і Выпочынку в Польковицях. На тоту хвилю одберана єст інвестиция, котру зреализували в рамках Громадяньского Буджету. Інгалятория находит ся при амфітеатрі, має форму шісткутной деревяной шопы з центральном стіном з тернины. Інгалятория є затінена, а вночы буде кольорово підсвітлена. Головным арґументом ініцияторів внеску, значыт жытелів Польковиц, жебы побудувати такій обєкт, было тото, што повітря, котрым мож гын дыхати, має в собі вельо цінных мікроелементів і приносит полегшыня особам, котры борют ся з хворотами щытоподібной залозы або хронічным запаліньом дыхальной системы.

Того рока ліпше як влони

Літній сезон над озером в Климківці был подля власти барз успішный. За статистиками поданыма війтом ґміны Ропа – Карольом Ґурскым, над озером выпочывало веце як 30 тис. осіб. Част то были туристы, якы приіхали на долшый час, а част лем на єден ден. Векшіст приізджала над озеро автами, што спричыняло проблемы з паркуваньом. Того рока над воду приіхало о 5 тис. веце осіб як влони. Климківскій штучный резервуар занимат простір коло 300 гектарів, ціліст бывшого села нашла ся під водом.

Фот. ug.lubin.pl