Сумар дня на 13. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 13. жолтня/октобра 2020 р.

Реновация воєнных цмонтерів в Команчы, Воли Миховій і Зубеньску

В Команчы, Воли Миховій і Зубеньску тырвают роботы при реновациі цмонтерів з періоду І світовой войны. Цмонтері попрятано і очыщено з кряків. На цмонтерях в Команчы і Воли Миховій замонтуваны были новы деревяны центральны кресты. Додатково в Команчы поміщено дубовы основы, котры вказуют місця колективных могыл. Зрыхтувано тіж нову фіртку, што навязує до істнуючого огороджыня. В плянах єст іщы обсадити пляц грабами і тисами. Подібны ремонтово-консерваторскы працы ведены сут на воєнным цмонтери в Зубеньску, де зрыхтувано новый підхід до цмонтеря. Замонтувано тіж інформацийны знакы о локалізациі цмонтерів та мапы пути, што вказуют як до них дойти. Вшыткы роботы ведены сут згідні з консерваторском документацийом, а задачы фінансуваны сут з середків Підкарпатского Воєвідского Уряду в Ряшові.

«Памят і слезы. Пісня о Лемках»

Припоминаме, же од пятниці, 9. жолтня/октобра, в Містецкій Публичній Бібліотеці в Ґорлицях мож обзерати выставу пн. «Памят і слезы. Пісня о Лемках». Авторами презентуваных знимок сут студенты Академіі Аніма Мунді, школы артистичной фотоґрафіі, яка веде курсы і варштаты з обшыри цифровой і аналоґовой фотоґрафіі. Выстава презентує 60 фотоґрафій выконаных в циянотипіі, што поділены сут на пят катеґорий: антрополоґію, історию, социйолоґю, реліґію і джендер. Цілю експозициі єст вести обзерачів через Лемковину, вказуючы цмонтері, капличкы ци стары села похованы по Низкым Бескіді. Експозиция мала бы в шыршым контексті мотивувати до рефлексиі не лем над світом Лемків, але і загальні чловечом кондицийом. Выстава буде доступна лем до кінця того місяця.

З Любіна до Польковиц новом експресовом дорогом

Быти може уж од грудня/децембра того рока З Любіна до Польковиц мож буде іхати новом експресовом дорогом. Будова части експресовой дорогы С3 [S3] медже Казьмєжовом а Любіном Пілніч не была легка, але помалы завершают ся роботы. Новый выконавця мусіл поправити скорше зробленый одтинок експресовой дорогы по своім попереднику, єдночасно реалізуючы дальшы части С3 [S3]. На ріжных одтинках головной трасы проходит підбудова та кладеный єст асфальт. Реалізуваны сут роботы при електриці, освітліню і конструкциі ретенцийных контенерів. Выконавця надіє ся, же до кінця того рока оддаст до хоснуваня єдну смугу головной дорогы.

Варголь в Відни

В Музею Модерной Штукы МУМОК в Відни проходит выстава єдного з найбарже знаных Русинів, вызначного артисты, короля поп-арту – Енді Варголя, і його менше знаных прац. Выстава пн. «Блищача альтернатива» поділена єст на дві части. Єдна з них зосереджат ся на роботах Варголя з його молодости. Сут то головно рисункы, образы і творы з выстав з 1950 рока. Друга част выставы вказує короля поп-арту як выставового артисту і артисту од інсталяций. Музей презентує на єдным з поверхів одтворены інсталяциі Варголя з років 1960-1980. Єдныма з барже інтересуючых робіт, што мож видіти в Відни, сут «Срібны хмары» і «Тапета з коровом». То подвійна інсталяция, котру артиста створил в 1966 році в нюйоркскій ґалериі. Сут то дві протиставны працы, єдна з саль выполнена єст срібныма балонами, друга єст цілком порожня, а на стінах видно лем тапету з червеном коровом. Выставу мож обзерати до 31. січня/януара 2021 рока.