Сумар дня на 13. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 13. вересня/септембра 2021 р.

XVI Світовый Конґрес Русинів

В пятницю і суботу, 10. і 11. вересня/септембра , в Креници одбыл ся XVI Світовый Конґрес Русинів. Присутны были на ним членьскы русиньскы орґанізациі і активісты з Польщы, Словациі, Украіны, Чех, Мадяр, Сербіі, Хорвациі, Румуніі та Зъєднаных Штатів Америкы і Канады. На офіцияльній части были присутны і представникы польскых самоурядовых власти, м.ін. бургомайстер Крениці, Пьотр Рыба, і староста ґорлицкого повіту, Мария Ґубала. Передано і Преміі ім. Василя Турока-Гетеша за послідні два рокы, за вызначный вклад в розвиток і покріпляня русиньской (лемківской) культуры. Оцінены были Маестро Ярослав Трохановскій, основатель і долголітній ведучый Репрезентацийного Ансамблю Лемків в Польщы «Лемковина», та член Світовой Рады Русинів, доктор історично-культурных наук, Юрий Фірцак з Румуніі. Передана была і нагорода Pro Arte Ruthenorum для Влада Няраді. На функцию председы зас выбраный был др Штефан Лявинец з Мадяр. При тогорічным конґресі одбыл ся і Х Медженародный Форум Русиньской/Лемківской Молодежы, новом ведучом якого выбрана была Олена Стефановска.

Володимир Микыта першым лавреатом Нацийональной преміі за русиньску штуку

Першым лавреатом Нацийональной преміі за русиньску штуку імени Івана Манайла Pro Arte Ruthenorum стал Володимир Микыта. Лавреат є членом Союзу Малярів Украіны, Народным Художником Украіны, академіком Академіі Штукы Украіны і єдным з представників підкарпатской малярской школы. Премія была основана Світовым Конґресом Русинів вєдно з Русиньскым Нацийональным Самосправуваньом міста Вац на Мадярах на засіданю XV Світового Конґресу Русинів в 2019 році. Нагорода была передана Микыті 27. серпня/авґуста тр. в Ужгороді. За основателів премію передала голова Фонду Підпоры Гуманітного Розвитку імени Федора Манайла Віктория Манайло-Приходко.

Фестіваль традициі, культуры і ремесла в Ґорлицях

В минулый вікенд, 11.-12. вересня/септембра, проходил ґорлицкій фестіваль традициі, культуры і ремесла «До корени!». В його рамках на ґорлицкым рынку проходили кєрмеш загыбаючых професий, выстава фотоґрафій і музичны концерты. В Павілоні Істориіі Міста мож было додатково брати участ в бібулкарскых і лялькарскых варштатах. Подія мала в ориґінальный спосіб проближыти локальну історию і традицию реґіону, культуру Лемків, Жыдів і Погірян. Фестіваль завершыл концерт, на котрым запрезентували ся Реґіональный Танцювальный Ансамбль «Погіряне», Ансамбль Руской Бурсы в Ґорлицях «Терочка» і Лемківскій Фольковый Ансамбль «Серенча».

Лемківскій Кєрмеш в Йонкерсі

Іщы лем до заране, 14. вересня/септембра, мож резервувати місця на Лемківскій Кєрмеш, якій одбуде ся в Йонкерсі в штаті Новый Йорк. Кєрмеш буде проходил в неділю – 24. жолтня/октобра тр., од 15.00 до 19.00 год., в реставрациі Fairways в ґольфовым клюбі Dunwoodie. Діти ниже 10 рока жытя входят дармо, молодіж і дорослы мусят перше придбати білеты. Забаві буде товаришыла музика в выконаню Lem Joy Trio. Чысло місц ограничене.