Сумар дня на 13. січня/януара 2025 р.

Приносиме вам сумар медияльной ґрупы ЛЕМ.фм+ на ден 13. січня/януара 2025 р.

Власти хотят достосувати меншыновый закон до сучасности

В минулу пятницю 10. січня/януара шеф Міністерства Внутрішніх Справ і Адміністрациі Томаш Сємоняк взял участ в пресовій конференциі на тему 20. років обовязуваня закону о нацийональных і етнічных меншынах та реґіональным языку. Оцінил, же реґуляция здефініювала на 20 років реляциі Польщы з меншынами. Припомнул, што на основі той реґуляциі пару місяців по єй схваліню покликано Спільну Комісию Уряду на Нацийональных і Етнічных Менышн. Як подал, «устава не припадком была принята пару місяців по тым, як Польща вошла до Европейской Уніі, бо навязує до европейскых стандардів демократичных держав, праворядных держав, котры акуратно в такій спосіб реґулюют своі реляциі з нацийональныма і етнічныма меншынами». Актуальный уряд хоче вказати, што розвязуют вшыткы проблемы в спосіб згідный з правом і максимальном отвертістю на проблемы нацийональных і етнічных меншын. Міністер Сємоняк подал, же дискутуют і о потребі новелизациі того закону, жебы достосувати го до сучасности, до жадань і потреб меншын. Бесіды на тоту тему неодолга мают ся зачати в рамках Спільной Комісиі Уряду та Нацийональных і Етнічных Меншын. Підчас конференциі выповідал ся і спілведучый Комісиі з меншыновой страны – Григорий Куприянович. Окрем інчого інформувал, што меншыны постулюют покликати Раду Нацийональных і Етнічных Меншын, а тіж звернул увагу на брак репрезентациі меншын в актуальній каденциі парляменту.

Польщы залежыт на зміцніню зовнішніх границ ЕУ

Шеф Міністерства Внутрішніх Справ і Адміністрациі Томаш Сємоняк стрітил ся з комісарьом Европейской Уніі до внутрішніх справ і міґрациі Маґнусом Бруннером. Стріча прошла в четвер 9. січня/януара. Взяли в ній участ і віцемністер Мацєй Дущык та директор Представительства Европейской Комісиі в Польщы Катажына Смык. Темом стрічы были пріоритеты польской президенциі в Раді ЕУ. Бесіды тыкали предовшыткым зміцніня безпекы ЕУ, в тым квестиі міґрациі і границ, внутрішньой безпекы ци охороны громадян. В квестиі міґрацийной політикы підкрислено, што Польщы залежыт на дальшым зміцніню зовнішніх границ ЕУ і запевніню ефективных можливости одповіди на інструментализацию міґрациі. Важном квестийом остає тіж зміцнія ефективности европейской поворотовой політикы. Польща підойме тіж дискусию на тему ключовых для членьскых держав обшыри, до котрых повинна ся односити нова унійна стратеґія внутрішньой безпекы. Стріча была першом офіцийном візитом комісаря Бруннера в Польщы.

Беляньскый експрес зас на торах

Під конец 2024 р. на торы вернул Беляньскый експрес, т.є. популярне черезграничне желизницьове получыня медже словацкыма Татрами і Мушыном по польскій страні. Потяг буде ходил реґулярно в кажду суботу і неділю аж до 23. лютого/фебруара тр. Потяг в вікенды ходит двараз на ден зо стаций Попрад-Татры і Мушына. Затримує ся в Студеным Потоку, Кежмарку, Спишскій Белій, Подолинци, Старій Любовни і Плавчу. Дрібниці, в тым розклад ізды, найдете в дописі на нашым портали.