Сумар дня на 13. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 13. серпня/авґуста 2021 р.

Експозиция в каштели Ракоция споминат і на Русинів

19. червця/юнія тр. прошло одкрытя зреконструуваного каштелю Ракоция в словацкым селі Борша. Присутны были м.ін. президенты Словацкой Республикы і Мадяр (Зузана Чапутова і Янош Адер). Каштель є знаный з того, же народил ся в ним Ференц ІІ Ракоций (1676 – 1735), семигородскій князь і вождж остатнього протигабсбурґского повстаня, в котрым воювали за него ай Русины. Реконструкция каштелю зачала ся в 2018 році і была фінансувана мадярскыма властями. Новый каштель служыт тепер як музей з експозицийом, але і як готель, ци реставрация. Зрыхтувана експозиция не приближат лем жытя Ракоция, але і його період загальні. Не забыто і на Русинів, называных Ракоцийом «найвірнійшым народом». Доступный є окремый русиньскій панель, де мож найти м.ін. текст пн. «Сполочна доля русиньскыма очами» і текст русиньской співанкы. При цілій експозициі сут присутны інтерактивны панелі. Дальшы доступны атракциі то напр. escape room ци ізба віртуальной реальности.

Фольклорна і етнічна музика на Підгірскій Театральній Параді

І того рока Театр КТО просит до Кракова на Підгірску Театральну Параду, орґанізувану в рамках проєкту «Штырі одтені театру». Не бракне фольклору, етнічной музикы і ріжнорідных культур. Подія одбуде ся 19. серпня/авґуста на Підгірскым Рынку. Проґрам зачне выступ Лемківского Ансамблю Пісні і Танця Кычера о 16.00 годині. О годину пройдут варштаты танця з ансамбльом, на якы треба ся перше записати майльовом дорогом. Дале Театр «Міґро» запрезентує дві пєсы – «Лавку» і «Дром – стежками Ромів». Параду завершыт Концерт татарскых пісен, з якыма выступит тріо Кароліна Ціха.

Новый дізайн банькы поливкы Campbell’s

Кінцьом липця/юлия тр. розлавлена в світі серийом ґрафік Енді Варголя поливка Campbell’s вказала новый дізайн банькы. В 1962 р. артиста створил трицет два образы, котры представляют вшыткы доступны товды смакы поливкы. Через пятдесят років дізайн оставал незміненый, тепер же лоґо і етикєты баньок были перепроєктуваны. Поєдны елементы были одсвіжены, на баньках явила ся і ґрафіка вказуюча головны складникы поливкы. Вєдно з ребрандінґом фірма ввела до продажы лімітуваный артистичный токен (NFT). Ілюстрация, запроєктувана Софі Чанґ, была выставлена на продаж в чыслі 100 штук і выпродала ся одраз.

Одкрыют видокову плятформу на Яворині

Уж од заране, 14. серпня/авґуста, одкрыта буде нова видокова плятформа на Креницкій Яворині. Войти на ню буде мож каждый ден од 9.00 до 19.00 годины. Плятформа находит ся на высокости 1022 метрів над рівньом моря. Буде з ней мож обзерати Татры і Низкій Безкід. Для одвиджаючых доступны будут видоковы люнеты обернены на штырі стороны світа. Для наймолодшых зрыхтувана єст парунадцетметрова ґравітацийна зъізджальня.