Сумар дня на 13. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 13. серпня/авґуста 2019 р.

Під Ґорлицями зас выбила ропа

Як подає порталь sadeczanin.info, під Ґорлицями зас выбила ропа. Тым разом пожарникы прібували опанувати вытіканя ропы в Кобылянці. Зачало ся од того, же хтоси достерюг в рові дивно выглядаючу мазь. Коли на місце приіхалы пожарны службы, вказало ся, же была то сурова ропа, выдобываюча ся з землі. В тій околици ропа вытікат уж не першый раз. Скорше было то в Санковій, Ропици Рускій і Мацині. В XIX столітю в самій Санковій функцийонувало 60 шыбів, а в Кленчанах діяла перша на світі рафінерия. Перша світова війна зрівнала вшытко з землом, так нафтовый перемисл в тый околиці устал. Як потверджают пожарникы, причыном такой частоты вытіканя ропы в посліднім часі єст правдоподібні закрытя експлоатуваных іщы донедавна джерел. Коли активно фунґували – тото, што мало выйти наверха, выходило як раз нима. Тепер же ропа вытікат вшыткыма можливыма дірами, што може в результаті принести дальшы того рода припадкы.

Лемківска Едукацийна Загорода в Ґладышові просит на “Жнива на Лемковині”

В найблизшу середу, 14. серпня/авґуста, в Лемківскій Едукацийній Загороді в Ґладышові одбуде ся подія пн. “Жнива на Лемковині”. Будут то варштаты, якы мают за ціль приближыти участникам процес проведіня жнив на давній Лемковині. В рамках варштатів каждый буде міг схоснувати ціпы, зробити наконец зерно, а в меджечасі навчыти ся клепати косу, ци посмотріти, як ся єй давно тому рыхтувало до жнив. Орґанізаторы окрем вказуваня практичных знань, будут оповідати і о культурній обшыри коло жнив, котры серед селян были трактуваны як барз важна подія. Лемківска Едукацийна Загорода сес проєкт реалізує в рамках спілпрацы в Ґміном Устя Рускє, котра фінансово підпорила подію.

Проєкт на будову амфітеатру в Крениці

Власти курортной Крениці заявляют, же іщы в тоты вакациі плянуют оголосити офіцияльный тендер на проєкт обєкту, котрый має быти збудуваный близко нижньой стациі желізничного пути на Паркову Гору. Як бесідує бургомайстер Крениці, Піотр Рыба, буде то одкрытый амфітеатр на 800 місц. Під сценом буде тіж збудувана інфраструктура – ґардеробы і тоалеты. Над сценом же буде задашыня, котре обыйме сцену і першых 5 рядів. Така концепция забудовы порішена є з консерватором. На тот момент, Крениця не має свойого місця в такым виді. Є лем складана сцена, котра не выполнят докінця свойой ролі. Бургомайстер Крениці рахує на тото, же інвестиция буде додатковым імпульсом розвитку для Крениці. Кошт будовы амфітеатру естимуваный є на 5-8 млн зл. Власти міста заповідают, же з будовом ґміна хоче почекати до нового розділу унійных фондів. До того часу плянуют зрыхтувати готову полну документацию.

Владислав Сивый рыхтує концертову трасу «Блюс в ничости світа»

Співаючий русинскый поета, творця музикы до своіх текстів, бард – Владислав Сивый, рыхтує концертову трасу по пряшівскым реґіоні. Концерты, будучы частю той трасы, названы сут «Блюс в ничости світа», а в репертуарі будут не лем знаны уж публиці співанкы Сивого, але буде і пару новых творів. Концерты збогачены будут парома вершами поеты, котры вырецитуют Яна Трущыньска і Іван Стропковскій. Першый концерт одбуде ся в найблизшу суботу, 17. серпня/авґуста о 18.00 год. в Домі Культуры в Выраві, а дальшы концерты будут проходити слідуючо в Снині, Свиднику, Чабалівцях і в Пряшові. О докладных термінах концертів співак буде іщы інформувал. Вступ на концерты є дармовый, а ціла ініциятива реалізувана є завдякы фінансуваню з Фонду на підпору культуры нацийональных меншын в Словацкій Республиці.