Сумар дня на 13. мая 2022 р.

Приносиме вам сумар медияльной ґрупы ЛЕМ.фм+ на ден 13. мая 2022 р.

Депутаты ПСК розділили дотациі

Депутаты Пряшівского Самосправного Краю схвалили на своім засіданю 9. мая розділіня своіх дотаций. Розділили 1,86 млн евро в штырьох підпроґрамах – спорт, культура, социяльны службы і родинна самосправа. За председом краю Міляном Маєрскым, завдякы депутатскым дотациям можут систематично розвивати реґіоны. До Вызвы депутатів ПСК было зложеных 607 внесків, з чого підпореных было 530. На спорт призначено понад 713 тис. евро. Грошы мают іти м.ін. на выпочынковы зоны ци будуваня і модернізацию дітячых пляців. На культуру піде в сумі понад мілийон евро. Дотациі схоснуют на выбавліня і модернізацию культурных домів, выбавліня ансамблів, реконструкцию храмів, орґанізацию подій і фестівалів, а тіж консерваторскы працы. На социяльны службы піде близко 84 тис. евро. В рамках родинной самосправы близко 55 тис. евро піде прим. на родинны подіі, просторы про сеньорів ци выпочынковы зоны про родины з дітми і сеньорів. Вызва депутатів ПСК є лем єдном зо штырьох ґрантовых схем Пряшівского Краю.

Тырват ремонт дорогы з Поворозника до Тылича 

Фурт в ремонті повітова дорога з Поворозника до Тылича. Роботы зачали ся в минулым році. Выміняный єст асфальт, ремонтуваны побоча і тротуары. Ремонтуваных єст і сім мостів на обшыри ґмін Мушына і Крениця. Роботы ведены сут етапами. В звязку з модернізацийом дорога нр 1513 была вчера закрыта для руху на одтинку од місцевости Поворозник і Тылич до крижівкы з повітовом дорогом в Тыличы. Обізд воєвідском дорогом нр 971 і повітовом дорогом 1512 обовязує до днес до 17.00 год. Завершыня вшыткых прац на 8-кілометровій дорозі єст плянуване на червец/юній тр. Кошт інвестициі то близко 13 млн 300 тис. зл, з чого 55% покрыват дофінансуваня з Урядового Фонду Самоурядовых Доріг, а решта походит з буджету новосандецкого повіту.

Округлый ювілей Рутеніі

В суботу, 4. червця/юнія, Фольклорный Ансамбль Рутенія буде святкувал своє десятлітя. Гостинні на подіі выступлят і дівочый фольклорный ансамбль Ґайдошік і актор Владимір Чема. О 18 год. в Домі Культуры Zrkadlovy háj в Братиславі свою премєру буде мала пєса пн. «Хырбетом ґу горам». Зосереджат ся она на важній про русиньскій нарід першій половиі 20 столітя. В танцювальных частях пєсы зосереджают ся на русинскых реґіонах пілнічно-східньой Словациі і давній Підкарпатскій Руси, завдякы чому презентуют богатство і ріжнорідніст русиньского фольклору з цілой заселеной Русинами землі, яка ся товды находила в Чехословациі. Звертают увагу, же хоц границі і державы міняли ся в минулым столітю, то Русины остают єдным, неподільным народом, а іх культурове богатство єст спільным русиньскым богатством. Дрібниці про подію найдете м.ін. на фейсбуковым фанпейджы ансамблю.

Промоция І тому річника «Res Carpathica»

Стоваришыня Res Carpathica і Центральна Гірска Бібліотека PTTK просят на промоцию І тому річника «Res Carpathica». Стріча пройде в четвер, 9. червця/юнія о 18 год. в конференцийній сали Центрального Осередка Гірской Туристикы PTTK в Кракові. Річник «Res Carpathica» складат ся з трьох части: науковой, популярной і хронікарской. Был печатаный основаным пят років тому в Варшаві Стоваришыньом о тій самій назві. Ініцияторы проєкту хотіли створити свого родa простір ци лавку, што мала бы лучыти карпатскых творців вшелеякых заінтересувань і языків.