Сумар дня на 13. марця 2020 р.

Приносиме вам сумар медияльной ґрупы ЛЕМ.фм+ на ден 13. марця 2020 р.

Святый Синод Екуменічного Патріархату Константинополя-Нового Риму про пандемію коронавіруса

11. марця під ведіньом єрархы Варфоломія засідал Святый Синод Екуменічного Патріархату Константинополя-Нового Риму. В першых словах специяльного посланя признал він, што пандемія коронавіруса є поважном справом, котрой християне не можут легковажыти або іґнорувати. Патріархат підкрислил, што православна Церков поважала і поважат досяніня і доробок медичных наук, в звязку з тым закликано вшыткых вірных, жебы дотримували вшыткы профіляктичны рекомендациі тыкаючы пандеміі кєруваны през Світову Орґанізацию Здоровля, як і адміністрацию і професийны службы в поєдных державах. Звернено увагу, што для християн повинно быти очывидным, што віра в Бога і його трансценденцию не затримує активности людского розуму і рацийональной поставы взглядом явиск, з котрыма стрічаме ся в реальности. Середова одозва Святого Синоду в Константинополю є першом офіцийном реакцийом в звязку з загорожыньом коронавірусом зо страны автокефалиі, яка занимат перше, почестне місце в диптиху вшыткых православных Церкви.

Проблеми і розвязаня для ґорлицкого повіту

В четвер, 5. марця 2020 р., бургомайстры і війтове ґмін ґорлицкого повіту вели бесіды вєдно зо старостком ґорлицкого повіту Марийом Ґубалом о проєкті Стратеґія Малопольща 2030. Зосереджено ся на трьох основных проблемах. Першым є брак воды на обшыри цілого повіту, але особливо в пілнічній його части. Другым – квестия комасациі ґрунтів і упорядкуваня ґеодезийно-картоґрафічных засобів. Брак правильной евіденциі ґрунтів і будинків неґативні влият на інвестициі, не дає можливости, жебы возникнули великы і сильны стрефы економічной активности. Третім проблемом дискутуваным на засіданю было комунікацийне выключыня, што є болячком більшости ґмін ґорлицкого повіту. Закінчыньом засіданя было выпрацуваня пропозиций змін. В комунікацийній квестиі запропонувано встановліня порозумліня медже малопольскым і підкарпатскым воєвідствами. Договор мал бы злегшыти аплікуваня о европейскы середкы і реалізацию спільных задач в обшыри транспорту та дороговой і желізницьовой комунікациі. Спільна могла бы быти і політика взглядом нафтовой індустриі, Маґурского Нацийонального Парку ци Пути Деревяной Архітектуры. В дальшых пропозициях вымінено получыня ґорлицкого повіту з Містецком Функцийональном Обшырю Нового Санча ци утворіня Ґорлицкой Специйяльной Обшыри.

Важне – анкєта про комунікацийны потребы для жытелів ґорлицкого повіту

З звязку з проблемом комунікацийного выключыня, якій тыкат більшости ґмін ґорлицкого повіту, ґорлицка старостка Мария Ґубала зарядила провести серед жытелів повіту анкєту. Хоче ся з ней дознати опініі жытелів про потребы з обшыри автобусовых получынь, аналізы того, што є тепер, а чого бракує. Дальшым кроком буде зрыхтувати стратеґію комплексового розвязаня проблему, в тым зреалізувати реґулярны перевозы в рамках колективного транспорту орґанізуваного повітовым самоурядом при підпорі поєдных ґмін. Важным є, жебы як найвеце жытелів ґорлицкого повіту ся выповіло. Анкєта до выполніня в інтерактивній формі, занимат тото менше як 5 минут. Мотузок доступный є на офіцийных сайтах вшыткых ґмін, на страні староства та на сайті lem.fm при дописі Наталиі Малецкой-Новак про бесіду над проєктом Стратеґія Малопольща 2030.

Выремонтуют дальшы капличкы

Іщы до кінця дня єдиниці самоуряду з обшыри малопольского воєвідства можут складати внескы о дофінансуваня ремонту капличок в рамках проґраму Малопольскы Капличкы 2020. Того рока сума грошы на тоту ціль то аж 750 тис. зл. Капличкы, котры находят ся на приватных ділянках, тіж можут быти выремонтуваны – треба, жебы властитель нерухомости навязал спілпрацу з одповідньом му ґміном або повітом. Обєкты, котры будут ремонтуваны, не мусят быти в реґістрі памятників, ци то малопольского воєвідства, ци то ґміны, але повинны характеризувати ся артистичныма і історичныма приметами. Дотепер завдякы приділеным фінансуваням в квоті 4 млн зл повело ся выремонтувати більше як 470 капличок.