Сумар дня на 13. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 13. лютого/фебруара 2025 р.

Грекокатоликы зберают на ремонт каплиці на Святій Горі Явір

Грекокатолицкы вірны зберают на ремонт каплиці на Святій Горі Явір. Орґанізатором збіркы, яка оголошена была на сайті zrzutka.pl, єст грекокатолицка парохія Вознесіня Господнього з Ґладышова. Каплиця, яка належыт од парох років до грекокатолицкой Церкви, потрібує модернізациі зовнішніх стін – елевациі. Дотеперішня елевация є уж в планным стані. Знищены сут тіж выгляды при ґанку. Жертвы мож подавати на номер банкового рахунку, што поданый на сайті zrzutka.pl. Парохія на основный ремонт зовнішніх стін обєкту хоче зобрати 20 тис. зл. Каплиця на Святій Горі Явір была вознесена в 1929 р. В тым, 2025 р. вірны святкуют 100. річницю од першых обявлінь.

Ґорлиці номінуваны до конкурсу «Модернізация рока і Будова ХХІ столітя»

Ґорлиці отримали три номінациі до фіналу загальнопольского конкурсу «Модернізация рока і Будова ХХІ столітя». В тогорічній едициі выріжнены были ревітализация Ґорлицкого Центра Культуры, задашыня ледовиска і тенісовых кортів та ремонт одкрытого басену в Ґорлицях. Цілю конкурсу є выбраня обєктів, якы были будуваны або модернізуваны, а котры выріжняют ся якістю, фунцийональністю ци естетиком. Конкурс то не лем нагода, жебы отримати нагороду, але предовшыткым для такого міста як Ґорлиці нагода на промоцию далеко поза границями реґіону.

В Лютині одбыла ся стріча высвяченых осіб

В Базилиці Успінія Пресвятой Богородиці в Лютині, в суботу 8. лютого/фебруара одбыла ся митрополитарна стріча свяченых осіб з єпископами грекокатолицкой Пряшівской Митрополитарной Церкви. В стрічы брало участ понад 110 монахів і монахынь з 8 грекокатолицкых чынів і конґреґаций цілой митрополитарной церкви sui iuris на Словациі. Архієрейску літургію служыл владыка Йона Максим, пряшівскій архієпископ і митрополита. Проповід дал братиславскій єпарха кыр Петро Руснак. Стріча закінчіла ся Акафистом до св. Миколая.

Карпаторусиньскє Общество має нову ведучу

Русиньска орґанізация в ЗША – Карпаторусиньскє Общество має нову ведучу. Была ньом выбрана Мері Анн Сромоскі. «Єм мі велику честю, што была єм выбрана на председу Карпаторусиньского Общества. Тото стоваришыня одгрыват важну ролю в захованю богатой дідовизны карпаторусиньского народу […]» – написали на фейсбуковым сайті Общества, цитуючы нову ведучу. Карпаторусиньскє Общество выникло в 1994 р. і його цілю є утримуваня і сохраніня свойой русиньской культуры, істориі, языка і спадковины русиньскых предків. Зато Общество приготовлює многы культурны подіі, але і зберат історичны, ґенеалоґічны, языковы і етно-культурны інформациі о Карпатскых Русинах.