Сумар дня на 13. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 13. лютого/фебруара 2024 р.

Капличкы Малопольщы 2024

Рушыла дальша едиция конкурсу «Капличкы Малопольщы», якій направленый єст на єдиниці територияльного самоуряду з малопольского воєвідства, што піднимают консерваторскы, реставраторскы або будівляны працы при памятковых капличках находячых ся в Малопольщы. В тым році Самоурад Малопольского Воєвідства передаст на тоту ціль 700 тис. злотых. Цілю конкурсу єст захованя для будучых поколінь вартістных обєктів, будучых важным елементом культуровой дідовизны Малопольщы. Обєкты не мусят быти в воєвідскым ци ґмінным списку забытків, повинны лем мати артистичну і історичну вартіст. Максимальна квота дофінансуваня то 40 тис. злотых і не веце як 60% коштів реализациі цілости прац. Внескы мож складати до 20. лютого/фебруара тр. В минулых едициях конкурсу повело ся одновити понад 720 обєктів, в тым цінны капличкы з Лемковины, за суму понад 7 млн злотых.

Самоурядова Галя Спорту Мідьового Басену

По парох роках перервы до Мідьового Басену вернула Самоурядова Галя Спорту. Цілю подіі єст нагородити спортовців і тренерів з більше як 20 самоурядів Мідьового Басену і околиц, за штоденный труд при тренінґах і старанях в ривализациі. Як підкрислил присутный на стрічы віцеміністер спорту Пьотр Борис,подякуваня кєруваны суті тіж до вшыткых меценасів спорту і самоурядів. Серед нагородженых з ґміны Польковиці нашли ся кошыкаркы з клюбу KGHM BC Polkowice та професийный Мастер Світа в кікбоксінґу Бартош Мушыньскій, для котрого влонишній сезон был остатнім в карєрі. В часі ґалі статую Самоурядового Приятеля Спорту Нижнього Шлеска отримал  бургомайстер Польковиц, Лукаш Пузнєцкій. Почестный Патронат над подійом тримат Міністерство Спорту і Туристикы.

В Костелі Дівы Мариі в Ліґници молили ся о єдніст християн

В Євангелицко-Ауґсбуржскым Костелі Дівы Мариі в Ліґници представникы ріжных  віроісповідань взяли участ в молитві о єдніст християн. Тогорічна подія прошла під гослом «Люби Господа Бога свого… а свого близнього, як самого себе». Молитву вюл о. Єжы Ґансель, парох єванґелицко-ауґсбуржской парохіі, якій повіл, што стрічы – такы як тота- сут потрібны. До молитвы запросил каждый костел, церкву і християньску спільноту з Ліґниці та жыдівску ґміну. В торжественній молитві участвовали о. Пьотр Вавжынек- помічный єпископ ліґницкой єпархіі, о. Любомир Воргач – парох православной парафіі, о. Мирослав Драпала парох грекокатолицкой парафіі в Ліґници і пастор Збіґнєв Вєжховскій – парох Християньского Костела Бабтистів в Ліґници. Присутный был тіж президент міста Тадеуш Кжаковскій. Матерялы до тогорічньой молитвы зрыхтувала екуменічна ґрупа з Буркіна Фасо.

«Карпатскій Соспільно-Культуральный Перегляд»

Вышол черговый номер часопису «Карпатскій Соспільно-Культуральный Перегляд». В публикациі мож чытати м.ін. статю пн. «Шляхтівска Русь на кресах етнічного волошского осадництва» ци допис Анджея Потоцкого про гуцульскы капличкы. В новым чыслі «Карпатского Соспільно-Культурального Перегляду» поміщена і статя про культурове значыня рослин, охорону природы в Румуніі та допис про Музей Ліптовского Села в Прибыліні. Часопис єст доступный на інтернетовым сайті procarpathia.pl.

Фот. Діґітальный Архів Тур Тондос