Сумар дня на 13. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 13. листопада/новембра 2024 р.

30 років Рамовой Конвенциі о Охороні Нацийональных Меншын

30 років тому Рада Европы приняла Рамову Конвенцию о Охороні Нацийональных Меншын. Є то першый правні обовязуючый мультілятеральный інструмент присвяченый охороні нацийональных меншын на цілым світі. Його імпрементацию моніторує медженародный комітет, якій занимат ся правами меншын. Комітет Рады Европы Конвенцию принял докладні 10. листопада/новембра 1994 рока, обовязує уж в 38 державах. Документ є єдным з найбарже комплексовых догварінь Рады Европы. Його цілю є охорона нацийональных меншын. Самоідентифікация є тым основным правом меншын, што уняте є в конвенциі, окрем того право до свобідного выражаня етнічной, культурной, языковой і реліґійной ідентичности, ци право не быти дискримінуваным. Польска держава стала ся страном той Конвенциі од квітня/апріля 2001 рока.

Торжества в церкви в Команчы

В суботу 9. листопада/новембра в церкви Покровы Пресвятой Богородиці в Команчы, під почестным покровительством Президента Польской Республикы Анджея Дуды, празднували 100. річницю Автокефалиі Польской Православной Цервки. Торжество очолювал архієпарха Паісий, ординарий ґорлицко-перемышльской єпархіі. В рамках празднуваня при церкви поставили і посвятили крест та пропамятну таблицю на камени. Торжество было тіж нагодом до вручыня одзначынь – за роботу на хосен Цекрви в році Ювілею Православной Церкви в Польщы медалями Св. Максима Ґорлицкого одзначены были: о. прот. Михал Коник, Йоан Гаргай та Йоан Лайкош. Бурмайстра ґміны Команча Романа Бздика нагородили грамотом благословліня.

Зміны в Заряді та Раді Польковицкого Повіту

В Заряді та Раді Польковицкого Повіту прошли зміны. З функциі члена Заряду зрезиґнувала радна репрезентуюча ґміну Хоцянів Беата Рольска, котра єст ціненом педаґожком, орґанізаторком благодійных і волонтерскых акций в ґміні. В звязку з тым Староста Каміль Цюпак запропонувал кандудатуру Пьотра Вандича, тіж репрезентанта ґміны Хоцянів. Кандидатура была принята через голосуваня. Пьотр Вандич в Раді Повіту є першый раз, єст ціненым соспільным діячом, а особливы заслугы має в роботі для протипожаровой охороны. Зміны прошли так само в Президиюі Рады Польковицкого Повіту. Радный Вандич зрезиґнувал з функциі заступці ведучого Рады, а на його місце Рада заголосувала за кандидатуром Беаты Рольской.

Уж парусот вписаных на ЛУТ 2025! Долуч до Русин-Лем

Не опали іщы емоциі по тогорічній едициі змагань в біганю по горах Лемковина Ультра Трейль, а орґанізаторы доносят, што уж мож записувати ся на чергову едицию. В 2025 році буде мож зміряти ся на єдній з шестьох трас до выбору, долгости: 10, 30, 48, 70, 100 або 150 км. На стартовых списках є уж парусот осіб. До кінця того місяця обовязує найнизша ставка вписового. Змаганя проходити будут 18. і 19. жолтня/октобра 2025 рока. Надчеркнийме, што того рока, коронный дистанс 150 км – од Крениці по Команчу успішні закінчыл Кристян Трохановскій, Лемко з Собина, а Адриян Горощак, тіж з Нижнього Шлезка, зробил 100 км. Окрем того дальшы репрезентанты біговой ґрупы Русин-Лем закінчыли трасы долгости 10, 30 і 48 км. Каждый охочый при вписуваню ся на стартову листу може подати як назву клюбу, з котрого летит, як раз – Русин-Лем – є то одкрыта ґрупа, котра зосереджат лемківскых бігачів-аматорів, якы підперают ся вчас рыхтувань до бігу і вчас самого старту.