Сумар дня на 13. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 13. грудня/децембра 2023 р.

О якызку ненависти і погорды – гейту з полномічным Малопольского Воєводы до Справ Нацийональных і Етнічных Меншын в Кракові

Днес в Воєвідскым Уряді Малопольского Воєвідства в Кракові проходит стріча меншыновых і етнічных орґанізаций з полномічным Малопольского Воєводы до Справ Нацийональных і Етнічных Меншын. Вчас стірчы будут омовлены квестиі языка ненависти, языка погорды – гейту, злочынів з ненависти, бесідуваны будут і вступны результаты Нацийонального Повеслюдного Спису Жытелів і Мешкань 2021 в обшыри нацийонально-етнічній. До відома уряду было переслане писмо Стоваришыня «Руска Бурса» в Ґорлицях, што переслане было м.ін. до Маршалка Сойму, односяче ся до скандалічных слів посла Ґжеґожа Брауна, в котрых атакує лемківску меншыну. Зо страны Стоваришыня «Руска Бурса» в Ґорлицях і Стоваришыня Лемків присутна на стірчы є проф. Олена Дуць-Файфер.

Привернути памят замродуваным

Звертаме ся до вас з апельом – глядаме безпосередніх свідків або особы, якы мают якє-небуд знаня, о вбивстві з часу другой світовой войны – парунадцет лемківскых, ромскых і польскых діти было в 1943 році замордуваных нацистами на жыдівскым цмонтери в Новым Змигороді. Справа іде о приверніня належной ім памяти і упамятніня іх безіменного, а по правді блудні означеного і окрисленого, місця спочынку. Діти мали быти перше зогнаны до єдного місця в Крампній, пак перевезены і замордуваны. Тоты, котры мают даякє знаня на тоту тему, прошены сут о контакт – майльово natalia@lem.fm або телефонічні: +48 606 108 701.

Ґміна Санкова на высокым ІІІ місци

Вчас торжестенной ґалі Ранкінґу Ґмін Малополщы на 2023 рік прошло оголошыня лавреатів тогорічной 14. едициі. На подиюм на найліпшу ґміну подля ранкінґу нашла ся Ґміна Санкова. Ґміні признали ІІІ місце. Цілю ранкінґу є промувати ґміны, што выріжняют ся під оглядом соспільно-господарчого розвитку, активности і результатів досягненых в економічній і соспільных сферах, на основі даных браных з систему публичной статистикы та зовнішніх джерел. До обрахуваня синтетичного ранкінґового показника увзглядняли парунадцет інчых, як напр. середній дохід ґміны на 1 жытеля за рокы 2020-2022, выдаткы ґміны на 1 жытеля, середню річну высокіст середків з Евросоюзу і інчых джерел, што не підлігают зворотови, і вельо інчых.

Ремонт мосту для пішых

По десятьох роках хоснуваня мосту для пішых над двопасмовом дорогом в Польковицях Нижніх, пришол час на єй ремонт. На актуальны направы выконавця має шіст місяців, а остаточный час закінчыня то май 2024 рока. Выштко вказує на тото, што роботы скіначт ся уж в марци будучого рока. Як подає пресовый представник Уряду Ґміны Польковиці Роман Томчак, теперішній ремонт то ефект дорічного технічного перегляду. Кєд буде сприятлива погода, то в першій черзі направлят м.ін. одводняюче ґратя, выремонуют електрику, oбчыщат шкарпы і убочы. Міст не буде запертый для пішых, єдиным утрудніньом можут быти зужыня дакотрых місц.

Хто потрібує салі? В Собинові записы

Центр Культуры в Польковицях інформує, што о пару днів, 18. грудня/децембра рушат можливіст запису аренды сельскых світлиц на 2024 рок. Резервация обнимат записы на розмаітого рода подіі, такы як родинны імпрезы ци інчы. Резервациі будут принимати в Собині в годинах од 7.30 до 15.00. Нанимати можут особы, якы сут жытелями даного села, в котрым світлиця ся находит, але і особы споза шолтыства. Хто не може особисті ставити ся в Собині, може заняти салі під номером 76 844 04 44 або майльово: wynajecia@ckpolkowice.pl.

На концерті вызвучат композициі Маестра Ярослава Трохановского

В найблизшу суботу 16. грудня/децембра в Познані пройде Барз Музичный Етнічный Ярмак, котрый є фіналом проєкту «Окраі польской культуры» реализуваного Домом Культуры «Байка» при спілпрацы з Союзом Караімів в Польщы. В проґрамі є м.ін. коцнерт «Закоріняня» в выконаню Михала Ключенкы і Приятелів посвяченый трьом музичным традициям: караімскій, лемківскій і украіньскій. Михал Ключенко походит з Украіны, є потомком Караімів, а лемківску культуру познал м.ін. граючы в ансамбли n’Lem Folk. Шыршій публиці дал ся познати выступуючы разом з Кароліном Ціхом в проєкті «Караімска Музична Мапа». Закінчыньом буде Кашебска Гулянка, котру поведе Марек Чарновскій, вельолітній член фольклористичных кашебскых ансамблів.