Сумар дня на 12. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 12. жолтня/октобра 2023 р.

Ремонт старой школы в Білянці

Стара лемківска школа в Білянці буде ремонтувана – то інформация од ґміны Ґорлиці. Школа, яка находит ся в Білянці рахує більше як сто років. То місце, якє в своіх порогах долгы рокы гостило ансамбль «Лемковина» основаный Ярославом Трохановскым, а тіж Музей Лемківского Ремесла ім. Штефана Чергоняка, якій основал Павел Стефановскій. Роботы повязаны з цілым процесом уж ся зачали. Покля што урядникы рыхтуют адміністрацийну страну – отримуют позволіня, операты і кошты. Ґміна Ґорлиці з огляду на історичны цінности будівлі хоче провести головну модернізацию, так жебы школа служыла дальшым ґенерациям. Внесок зложеный в рамках Урядового Проґраму Одбудовы Памятників отримал акцептацию. Перша транша фінансового спертя вынесла 100 тис. зл, дальша 150 тис. зл. При школі стоіт памятковый сыпанец. Подля ґмінных власти дальшым кроком буде поданя внеску до ґорлицкого Староства о выданя позволіня на ремонт. Рішыня в тій справі повинно прити на зламі жолтня і листопада. Товды ґміна Ґорлиці оголосит конкурс, котрый выбере выконавцю робіт. Через наступный рік школа мала бы быти модернізувана.

В неділю будеме выберати

В найблизшу неділю, 15. жолтня/октобра 2023 р. будеме выберати кандидатів, якы на дальшы штырі рокы будут репрезентувати нашы інтересы в польскым парляменті. Серед громадян Польщы, якы станут при выборчых урнах, сут тіж Лемкы. В сесых выборах кандидют і особы, якы сут активныма лемківскыма діячами і декляруют своє лемківскє походжыня. Всітри кандудуют з формациі Третя Дорога. На Лемковині, з округу но. 22 кандидує Богдан Ґоч, ведучый Музею Лемківской Культуры в Зындрановій. З інчого округу на Лемковині кандидує Андрий Барна з Кунковы, актуальный радный ґміны Устя Рускє. То округ но. 14. На західніх землях Польщы (округ но. 1) кандидує теперішній польковицкій віцестароста, Ян Войтович, якого рід выходит з Ріпок і якій веде спілпрацу м.ін. з пшемківскым Кружком Стоваришыня Лемків. Заохочаме до активной участи в недільных выборах.

Інвестициі в Ліґници

Mісто Ліґниця отримат 32 мілийоны злотых з Польского Ладу. Дофінансуваня буде на три внескы зголошены містом. 22 млн зл мают быти перезначены на перебудову доріг в місті, 2 млн на ІІ етап ревітализациі містецкого парку, а 8 на ревітализацию памятковой обшыри ліґницкой Пальміярні. Позысканы середкы то близко 95% вшыткых коштів інвестиций. Актуально в Ліґници проходят ремонты головных доріг, м.ін. в околици центра од ліґницкой желізничной стациі.

В Польковицях одбыли ся соспільны консультациі

В уряді ґміны Польковиці одбыли ся соспільны консультациі в справі будовы біциґльовой дороы вздолж ул. 3 Мая. Жытелі Польковиц запропонували пару змін. Будова біциґльовой трасы ідучой через місто з пілночы на полудне то велика інвестиция. Місто поручыло зрыхтувати проєкт, якій тепер представлено жытелям Польковиц. На стрічу был запрошеный проєктант, котрый опрацувал цілу документацию. В консультациях взяло участ парунадцет осіб. Найважнійшом зміном, котрой домагали ся жытелі, было побудуваня зъіздів і можливіст переіздів вздолж вшыткых пішых переходів. Дискусия тырвала понад годину.