Сумар дня на 12. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 12. жолтня/октобра 2020 р.

Ученикы критикуют лісове ґаздуваня в Карпатскій Пущы і лісах Бєщадів

Більше як двіста вченых з цілой Польщы опубликувало одкрыте писмо, в якым критикуют лісове ґаздуваня в Карпатскій Пущы і лісах Бєщадів. Сиґнатариями сут головно выкладачы університетскых біолоґічных выдилів, але сут тіж медже нима економісты, специялисты од заряджаня ци ґеоґрафы. В писмі вказуют на свій великій непокій спричыненый браком діянь в справі створіня Турніцкого Нацийонального Парку або резервату Реліктова Карпатска Пуща, якій бы хоронил найціннійшы лісы Перемыльского Погіря, як тіж реалізуваным на тій обшыри лісовым ґаздуваньом, што веде до значучой трансформациі або і знищыня цінных природничо лісів і збільшыня проблему сушы. Сут занепокоєны економічныма діянями в найціннійшых природничо лісах в отулині Бєщадского Нацийональого Парку, особливо на обшыри рекомендуваных резерватів природы находячых ся в Надлісництві Ступосяны. Апелюют розшырити резерватову охорону найціннійшых екосистемів проєктуваного парку, особливо беручы до увагы тяжко доступны обшыри. Хотят тіж розшырити обшыр стислой охороны і передумати можливіст вылучыти з вытинкы стары дерева. Підкрисляют, што стан охороны природы на тых теренах свідчыт о глубокым кризисі і недостаточности орґанів, якы одповідают в Польщы за тот проблем.

Конкурсы для учеників

Незалежно од тырваючой пандеміі коронавіруса, Музей Русиньской Культуры в Пряшові фурт рыхтує новы активности, направлены на учеників дручой ступени основных шкіл, але не лем. Як інституция інформує на своім офіцияльным фанпейджы в сіти Facebook, ученикы можут ся приголосити до літературного конкурсу пн. «Ілько Сова з Баюсова». Конкурс єст повязаный з выставом Федора Віца, яка была одкрыта в вересни/септембрі і яку буде мож видіти в музею до кінця жолтня/октобра. На тот і будучый місяц сут тіж зрыхтуваны коментуваны перегляды актуальных выстав музею. Окрем того в просторах музею будут тіж проходити творчы варштаты, на якы мож ся приголосити незалежно од віку. При выставі Владиміра Ґаная пн. «Односины» варштаты будут тыкати крисліня сухым пастельом, зас в припаді выставы Федора Віца участникы будут творити крисленый гумор і коміксы. Веце інформаций найдете на фанпейджы музею в сіти Facebook.

Книжка про Лемковину номінувана до нагороды

«Бескід без кіту» Мариі Стшелецкой серед номінуваных до Нагороды ім. Фердинанда Вспанялого за найліпшу книжку 2019 рока. Нагороду передают од 2016 рока вчас фіналовой ґалі Фестівалю Літературы для Діти в Кракові. Признавана єст каждого рока для найліпшой польской книжкы для діти печатаной в попереднім році. Нагороду фундує Краків Місто Літературы UNESCO. В остатнім тыжни жолтня/октобра з номінуваных выбраных буде пятеро фіналистів, а результаты і переможцю конкурсу познаме 14. листопада/новембра. Книжка пн. «Безкід без кіту» авторства Мариі Стшелецкой то літературно-плястичне оповіданя для діти о Бескіді, о Лемковині – теперішній і тій сперед піл віка, о єй таємницях, культурі, природі. Окрем того книжку мож тіж хоснувати як природничный путівник. Діти прочытают в публикациі о птахах, слідах і рослинах, што находят ся в Низкым Бескіді.

Король поп-арту аж в Азиі

Варголя будут выставляти в Кытаю. Пекіньскій Центр Модерной Штукы заповідат орґанізацию выставы вызначного артисты русиньского походжыня Енді Варголя в 2021 році. Буде она доступна для одвиджаючых од 3. липця/юлия до 10. жолтня/октобра 2021 рока. Як бесідує сам куратор – Хосе Карльос Діяс – єст то найбарже комплексова експозиция творів короля поп-арту в державі. На выставі пн. «Енді Варголь» вкажут около 300 творів привезеных з родинного міста артисты – Пітсбурґа. Выстава буде поділена на пят секций, зачынаючы од першых прац, архівальных материялів і фотоґрафій. Буде мож обзерати і творы з Ню Йорка з 50. і 60. років ХХ ст., коли Варголь зачынал затерати границі медже красныма штуками і комерцийом. Не бракне прац інспіруваных полныма жытя улицями великых міст з 80 років. Знаны і основны творы короля поп-арту будут выекспонуваны разом з меншыма роботами. Некотры першыраз будут за границями ЗША.