Сумар дня на 12. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 12. вересня/септембра 2024 р.

Дальшы номеры «Карпатской Руси» доступны онляйн

Як сме інформували, Лемко-Союз в ЗША постепенно збільшат свою діґітальну бібліотеку, в котрій мож чытати архівальны выданя лемківскых ґазет публикуваных за великом млаком. В тых днях Лемко-Союз поінформувал, што в рамках продолжаня діґітализациі до базы были доданы 24 примірникы ґазеты «Карпатска Русь» за рокы 2013-2018. Одтепер примірникы сут доступны на сайті lemkoassociation.org. В діґітальній бібліотеці Лемко-Союза на прикликаным сайті найти мож і дальшы выданя. Окрем старых выдань «Карпатской Руси» доступны сут гын і номеры ґазеты «Лемко», яка была выдавана в Америці і была окремым часописом од знаных двох ґазет о тій самій назві на Лемковині.

Конференция посвячена проф. Удварі

Бібліотека Русинів Мадяр ім. проф. Іштвана Удварі в Будапешті, котра тот рік святкує 20. ювілей свого основаня, орґанізує в своіх просторах в четвер 12. вересня/септембра памятну конференцию на чест професора, по котрым має свою назву. В конференциі будут брати участ Віктор Крамаренко – председа Вседержавного Русиньского Самосправуваня, під котре бібліотека належыт, і Віра Ґіріц – посланкыня за Русинів в мадярскым Парляменті. Участникы выслухают штырьох лекций. Будут то доповіди м.ін. на тему істориі 20. років інституциі і єй цінности. Русиньскій лінґвіста Михаіл Капраль буде в доповіди занимал ся особом проф. Іштвана Удварі, котрого был колеґом на высокошкольскій русиністиці в Ніредгазі. О етноґрафічных конспектах діяльности Іштвана Удварі буде бесідувал Дюла Віґ.

Засіданя СКУтНіЕМ

В минулый віторок прошло дальше засіданя Спільной Комісиі Уряду та Нацийональных і Етнічных Меншын. Урядову страну представлял віцеміністер Томаш Шыманьскій. В засіданю брали участ представникы меншыновой страны та спілведучый комісиі і представник украіньской меншыны Григорий Куприянович. Вчас засіданя омовлено реґулямін признаваня дотаций на 2025 р. Документ є іщы в робочій версиі, прото стріча была потрібна, жебы меншыны могли представити своі заувагы. Вчас засіданя бесідувано тіж о справі збільшыня дофінансуваня на проєкты продолжаны в 2024 р., а тіж актуальны працы над покликаньом ансамблю до справ меншыновой едукациі.

Новосільскій і Мазовша

Містецка Публична Бібліотека ім. Зофіі Налковской в Пшаснишы просит на выставу під назвом «Юрий Новосільскій. Варшава і Мазовша». На выставі сут презентувы приміры сакральной творчости Новосільского, котру мож находити в церквах і костелах Варшавы і цілого Мазовша. Выставу мож обзерати до 28. вересня/септембра в Бібліотечным Одділіню для Дорослых. Юрий Новосільскій роками творил сакральну штуку на обшыри цілой Польщы, в тым дост дуже його прац было выконаных на потребы варшавскых храмів.