Сумар дня на 12. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 12. вересня/септембра 2022 р.

Мінеральна вода в Тяжковицях 

З верчыня в Тяжковицях выплынула мінеральна вода. Працы при верчыню ведены сут од липця/юлия на ділянці сусідуючій зо Здройовым Парком. Підземна вода выплынула з верчыня «Ігнатий» на глубокости близко 1000 метрів. Не было конечности механічного помпуваня. Пробкы воды были даны до лябораториі і сут досліджаны. Вступны анализы вказуют, же в воді неє ропы, што злегшыт процес єй фільтрациі. Кєд досліджыня потвердят, же вода має лікуючы властивости, буде то для Тяжковиц велика шанса на розвиток і отриманя статусу курорту.

Ден традицийных ремесел в Выгорлятскым Музею

Выгорлятскій Музей рыхтує про шкільну молодіж подію пн. «Ден традицийных ремесел». Одбуде ся она в тот четвер, 14. вересня/септембра, в скансені Выгорлятского Музею в Гуменным. Акция отверат проґрам вересньовых подій музею в рамках підпоры ідеі Дни европейской культуровой дідовизны 2022. Проґрам Дня традицийных ремесел єст заміряный на презентацию культуровой спадковины традицийногоно ремесельного выробу і народной штукы реґіону выжнього Земплина. Має підпорити ремесельны зручности діти і пробудити в них заінтересуваня розвитком традицийного ремесельного і артистичного потенциялу про зрівноважену будучніст реґіону. Окрем вчыня ріжного рода ремесельного фаху, діти будут ся мочы дознати і про сакральну архітектуру карпатского реґіону. Ден традицийных ремесел є продолжыньом музейного циклю пн. «Ґу коріням, традициям, цінностям».

Лемківскы звукы на Культурных Стрічах в Раділувці

Уж в тот вікенд на Підляшы в ґміні Мельник буде мож почути лемківску музику. В суботу, 17. вересня/септембра, одбудут ся Культурны Стрічы в Раділувці. Подія зачне ся переходом через село з пісньом і музиком. Пак на концерті в сельскій світлици запрезентуют ся студийо фольклору підляшскых Білорусинів Жемерва, фольклорный ансамбль Полішуків Криніченька і Роман Арлов з Білоруси. З лемківском музиком выступит наш Ансамбль Руской Бурсы Терочка. В проґрамі заплянувана єст і стріча з ведучым Товариства Любителів Поліся і Бялкова, презентация чергового чысла часопису «Мельницкій Гостинец» та кєрмеш книжок. Орґанізаторами подіі сут Стоваришыня Малой Отчызны в Студзіводах, Шолтыс і Рада Шолтыства села Раділувка та Ґмінный Осередок Культуры, Спотру і Рекреациі в Мельнику. Подію дофінансувало МВСіА в рамках Білорускых культурных діянь на надбужаньскій земли.

Набір членів до ансамблю Рутенія

Фольклорный ансамбль Рутенія оголосил набір новых членів. Охочы можут прити на пробу каждый віторок і середу од 22. вересня/септембра. Деталі про місце і час наборів находят ся на фейсбуковым сайті ансамблю. Як пишут, ниґде інде в Братиславі неє ансамблю, якій є посвяченый лем русиньскій культурі. Базуют на традицийній народній культурі і реализуют вельо інтересных проєктів – досліджыня, варштаты ци школы танця. Глядают новых членів до танця, співу і граня. Ансамбль Рутенія діє в словацкій столици од 2010 рока. Шырокій репертуар презентуют не лем на Словациі, але і в другых державах. Члены Рутеніі берут і участ в цілословацкых танцювальных і співочых конкурсах. Спілпрацуют з педаґоґами музикы і співу, режысерами, драматурґами, екстерныма народныма музиками.