Сумар дня на 21. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 21. серпня/авґуста 2023 р.

XVII Світовый Конґрес Русинів

В минулый вікенд в Новым Саді в сербскій Войводині предствникы Русинів цілого світа взяли участ в XVII Світовым Конґресі Русинів. Проґрам про делеґатів і гостів конґресу был поділеный на три дни. За Лемковину на Конґрес пришли делеґаты од Стоваришыня Лемків і Стоваришыня «Руска Бурса» в Ґорлицях. На тогорічным СКР присутны били і редакторы нашой медияльной ґрупы ЛЕМ.фм. В рамках конґресу прошли три пленарны засіданя, вчас котрых выбрано предсідателя Світовой Рады Русинів, котрым на наступны два рокы зас лишыл ся Штефан Лявинец, якій в парох словах підсумувал свою попередню каденцию

одповіл тіж на звіданя нашого редактора о новопідняты Конґресом політичны проблемы, т.є. вызнаня Русинів на Украіні, якы конечно достали ся на европейскій і медженародный рівен

На засіданях схвалили тіж новый святочный герб і выбрали місце наступного Конґресу, котрый пройде в Букарешті в 2025 році. На конец засідань предсідателі членьскых орґанізаций підписали меморандум о спілпрацы з другыма русинскыма орґанізациями. Конґрес для нашого радия скоментувал тіж почестный шеф Світового Конґресу Русинів, проф. Павел Роберт Маґочій

Проф. Маґочій доповіл тіж, што прорусиньску політику треба вести не лем на загальным і світовым рівни, але осібно в каждым місци, де прожывают Русины. В тым же часі, коли проходил СКР, засідал тіж Світовый Форум Русиньской Молодежы, на котрым його члены выбрали нову предсідательку, Світлану Бойчук з Румуніі, яка тым самым остала членкыньом Світовой Рады Русинів. Більше о XVII Світовым Конґресі Русинів можете прочытати на нашым портали lem.fm.

Потягом з Ґорлиц до Тарнова ци Кракова, місто світла жде на модернізацию леніі но. 110

Ремонт желізничной леніі но. 110 Ґорлиці – Ґорлиці-Загужаны єст зас актуальный. Рік тому в місті світла явила ся інформация о будучій модернізациі леніі, єднак в квітни/апріли тр. ремонт леніі был одложеный. Вшытко змінило ся в середу 16. серпня/авґуста т.р., коли Рада Міністрів приняла актуализацию Державного Желізничного Проґраму і зас взяла до нього проєкт леніі 110. Актуальні тота ленія, котра веде до центра Ґорлиц, не єст никым обслугувана, чого причыном єст злый уклад торів, котрый вымагат зміны чела потягу, што єст міцно проблематичне. В рамках проєкту плянує ся м.ін. побудуваня одтинка, котрый получыт ленію но. 108 зо Струж з ленійом но. 110 в Ґорлицях, зато переізд на тій трасі не буде вымагал зміны чела потягу. Тото даст змогу одкрыти получыня з самых Ґорлиц до Тарнова, ци – што важне для жытелів міста і студентів – до Кракова. Окрем лучниці в проєкті находит ся тіж модернізация стациі Ґорлиці і Ґорлиці-Заґужаны та ревітализация леніі но.110. Кєд вшытко піде за пляном, до кінця того рока місто выголосит записы на проєкт, а сама будова і модернізация зачнут ся в роках 2027-2029.

«На Малопольскым пути ремесла і рукоділа – варштаты, показы, торгы»

Музей Дворы Карвациянів і Ґладышів та Скансен Погіряньского села просят в найблизшый вікенд взяти участ в подіі «На Малопольскым пути ремесла і рукоділа – варштаты, показы, торгы». Стріча пройде 27. серпня/авґуста в Скансені в Шымбарку. Орґанізаторы рыхтуют ріжного рода атракциі: показ ремесла і рукоділа, варштаты керамікы, выробів з лозины, чачок з сіна ци робліня шкарпеток на дротах. Буде тіж можливіст безплатно звидіти музей з провідником. Подія зачне ся о 11.00 год., вступ платный лем єдну злотівку, а полный плян акциі найдете на сайті Музею Дворы Карвациянів і Ґладышів.