Сумар дня на 12. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 12. серпня/авґуста 2021 р.

Основатель Кычеры нагородженый

В суботу, 7. серпня/авґуста 2021 р., в Михалові загоріла єднодньова 41. Лемківска Ватра на Чужыні. Хоц обовязувало ограничене чысло присутных, то при михалівскым огни пришла ся огріти гідна жменя участників. Єдным з пунктів проґраму Лемківской Ватры было переданя тогорічной нагороды ім. Никыфора – Епіфана Дровняка за выдатны заслугы в обшыри лемківской культуры. Оцініня было признане Юрийови Стариньскому, ведучому Лемківского Ансамблю Пісні і Танця Кычера. Лявдацию в чест тогорічного лавреата выголосил Андрий Копча, ведучый Капітулы нагороды Стоваришыня Лемків. Бесідувал він, што Стариньскій заслужыл ся гідні для лемківской культуры. Спомянул на веденый ним колектив. Кычера з Ліґниці того рока святкує як раз свій ювілей – 30-літя діяльности. Юрий Стариньскій то аніматор культуры, хореоґраф, історик і дослідник лемківской культуры. Пак продолжаный был дальшый проґрам михалівской Ватры, де окрем концертів мож было придбати лемківскы книжкы ци засягнути інформаций односно Нацийонального Повселюдного Спису.

Andy Express

Туристичный історичный потяг, на котрый місто Меджелабірці чекало о пару місяців долше, як было плянуване, одбыл в минулу пятницю свою першу офіцияльну ізду містом. В ден недожытых 93. народин Енді Варголя ждал на лабірскій автобусовій стациі туристичный потяг Andy Express на прихід сезонового потягу Вояк Швейк з Польщы. Першы ізды туристичного потягу будут 50-минутовы і поведут з Лабірця до Калинова, пізнійше бы мал ходити і до Габуры ци на Монастыр в Красным Броді. Потяг є выслідком словацко-польского проєкту спілпрацы з партнерскым містом Коросно.

«Бескід без кіту»

Уж в суботу, 14. серпня/авґуста, одбуде ся премєра спектаклю молодіжной театральной ґрупы з Устя Руского. Артисты запрезентуют ся в спектакли, котрый возник на основі книжкы «Бескід без кіту». В проєкт заанґажувало ся вельо осіб з околиц Устя і не лем. Театральном опікунком ґрупы і авторком сценария єст Моніка Бабуля, о музичну оправу задбал Мирослав Боґонь, а вокально рыхтує ґрупу Юлия Дошна, котру так само буде мож видіти на сцені. В проєкт заанґажувала ся тіж сама авторка книжкы – Мария Стшелецка. Як підкрислила Марлена Моздзіньска, координаторка цілого проєкту, акция єст орґанізувана завдякы підпорі війта ґміны Устя Рускє, Збіґнєва Людвіна, але тіж завдякы тым, котры підтримали інтернетову колекту.

Новый туристичный центр в Свиднику

В Свиднику одкрыли новый туристичный інформацийных центр. Є він доступный сім дни в тыжни. Пункт має новый дізайново модерный простір з авдийовізуаьлным оформліньом, сувенірами, летучками, книгами і інчыма інформациями про місто Свидник. Туристичный інформацийный центр є отвореный од понеділька до четверга од 10.00 до 19.00 годины. В пятницю і в вікенды є отвореный од 10.00 до 20.00 годины. В туристичным центрі цікавых інформаций засягнут і туристы з Польщы.