Сумар дня на 12. мая 2021 р.

Приносиме вам сумар медияльной ґрупы ЛЕМ.фм+ на ден 12. мая 2021 р.

Малопольскє Воєвідство вєдно з учельнями

Уж заран буде підписане порозумліня в справі долготерміновой спілпрацы медже Малопольскым Воєвідством і высшыма школами. Порозумліня закладат спільну реализацию ключовых для реґіону і учелен інновацийных проєктів. Серед них м.ін. діяня в обшыри орґанізациі Господарчого Форум в Креници, котре пройде в вересни/септембрі, в тым покликаня Науковой Рады з участю представників найважнійшых академій. Документ тыкат тіж стислой спілпрацы в обшыри орґанізациі волонтерства вчас ІІІ Европейскых Спортовых Змагань.

Вручыня грамот для нагородженых в конкурсах реализуваных в рамках празднуваня Рока Русиньского Села

В Ґалериі Андрий Смоляк в Снині актуальні презентувана є выстава малюнків авторства діти і выстава фотоґрафій. Є то ефект двох загальнословацкых конкурсів реализуваных в 2020 році в рамках празднуваня Рока Русиньского Села выголошеного Округлым Столом Русинів Словациі. Найліпшы роботы серед надосланых малюнків професийне жырі выбрало в пятьох катеґориях. В рамках конкурсу на найкрасшу фотоґрафію русиньского села до великого фіналу достало ся 16 фотоґрафій. Уж заран о 15.00 год. пройде в ґалериі вручаня грамот вшыткым нагородженым, a саму выставу буде мож обзерати в сниньскій ґалериі до заране.

Лемківскє музикуваня в Чаплинку

В минулый вікенд зачали реализувати проєкт Локальной Туристичной Орґанізациі Чаплинок пн. «Лемківскє музикуваня на одзысканых землях». В його рамках прошли пробы ансамблів Зорюшка з Чаплинка та Гускарль з Ґнєзна, необхідны до зрыхтуваня одкрытых варштатів лемківской музикы і концертів. Цілю задачы є популяризувати язык і музичну культуру Лемків серед сучасного поколіня потомків выселенців жыючых на Західнім Помори. Жывый контакт з лемківском музиком має утырвалити заникаюче почутя лемківской достоменности в засимілюваным гын соспільстві. Проєкт єст реализуваный в рамках проґраму Нацийонального Центру Культуры ЕтноПольща 2021.

Спаня «на дико» в лісі

«Ночуй в лісі» то назва проєкту реализуваного Державныма Лісами. Напрявленый є він на особы, якы захоплены сут безпосереднім контактом з природом. В рамках проєкту удоступнены сут специяльны лісовы місця, де аматоры спаня близко натуры можут тото сміло робити без тырвогы о ламаня переписів. Проєкт єст ефектом пілотажу, котрый проходил в минулым році. Мапкы обшыри, на котрых мож спати в лісі «на дико», і реґуляміны доступны сут на сайтах поєдных надлісництв. Перед вандрівком до ліса треба тіж все конечні провірити, котры місця обняты сут заказом вступу, напр. з огляду на загорозу пожару. Актуальны даны находят ся тіж на сайті Банку Даных о Лісах.