Сумар дня на 12. марця 2025 р.

Приносиме вам сумар медияльной ґрупы ЛЕМ.фм+ на ден 12. марця 2025 р.

87. пленарне засіданя Спільной Комісиі Уряду та Нацийональных і Етнічных Меншын

Днес, 12. марця проходит 87. пленарне засіданя Спільной Комісиі Уряду та Нацийональных і Етнічных Меншын. Має оно особливый характер і складат ся з двох части: торжественной звязаной з 20. річницьом схваліня закону о нацийональных і етнічных меншынах та реґіональным языку і робочой части. На стрічы мают принагідны выступліня Міністер Внутрішніх Справ і Адміністрациі Томаш Сємоняк, Ведуча Комісиі Нацийональных і Етнічных Меншын Сойму Польской Республикы Ванда Новіцка, Дорадця Маршалка Сойму дс. Нацийональных і Етнічных Меншын Ришард Ґалля і Спілведучы Спільной Комісиі Томаш Шыманьскій і Григорий Куприянович. В контексті меншынового закону буде бесіда о його ґенезі, схваліню, результатах і оціні. Піднятя буде і тема новелизациі закону. Покликана буде робоча ґрупа Спільной Комісиі Уряду та Нацийональных і Етнічных Меншын дс. зрыхтуваня проєкту новелизациі. В робочій части стрічы буде м.ін. піднята тема поділу дотаций на реализацию в 2025 р. задач маючых на ціли охорону, захованя і розвиток культуровой достоменности нацийональных і етнічных меншын та захованя і розвиток реґіонального языка.

Ци лыжна стация в Щавнику буде готова на зиму?

Ґміна Мушына має наступны проблемы при реактивациі лыжной стациі в Щавнику. Початково власти хотіли уж того рока в грудни/децембрі одкрыти нову зимову атракцию. Реґіональна Дирекция Охороны Середовиска наказала ґміні провести додатковы анализы. Як передал бургомайстер Мушыны, Ян Ґольба, ґміна зрыхтувала уж рапорт влияня новой атракциі на середовиско, а актуальны документацийны вымаганя РДОС сут, в його опініі, великы. Задачом ґміны буде вказати місце розроду волків ци рысів, хоцкі, як подає Ґольба, то РДОС повинна мати пляны охороны з місцями выступуваня звірят. Ґміна уреґулювала справы власности стациі, замовлены сут тіж уж першы части. Власти боят ся, што бюрокрация причынит ся до опізніня реализациі задачы, котра може за тот час вымагати більшых фінансовых накладів.

В Санковій зачынают будову одкрытых басенів

Початком лютого/фебруара ґміна закінчыла конкурс оферт на реализацию будову одкрытых басенів. О выграну старало ся аж осмох выконавців, а доцільово будовом займе ся фірма з Коженной, тота сама, котра выграла конкурс оферт на будову санківскых терм. Выконавця выцінил роботу при будові одкрытых басенів на квоту понад 9 млн зл. Ґміна іщы в тым тыжни підпише умову, а на яр зачнут ся першы роботы. Згідні з концепцийом, нова атракция буде поділена на три стрефы: вхід, басенову і рекреацийну зону. В басеновій части найдут ся 4 басены з ріжныма губокостями і функциями. Пляново будова закінчыт ся в 2027 році.

Орґанізацийный Комітет упамятнінь 110. річниці Бітвы під Ґорлицями уж розпочал роботу

Початком марця покликано Орґанізацийный Комітет упамятнінь 110. річниці Бітвы під Ґорлицями. В його склад вошли самоуряды з Ґорлиц, Лужной, Санковой та культуральны інституциі, такы як Музей Дворы Карвациянів і Ґладышів ци PTTK в Ґорлицях. Цілю комітету єст зрыхтувати і координувати упамятніня, котры будут припоминати важну для цілого повіту історичну подію. Пройде она 2. мая і, як што рока, мож сподівати ся многых атракций, выстав, прелекций ци реконструкциі. Додатково, уж тепер знатя, што упамятніня округлой річниці Бітвы під Ґорлицями прикрасит концерт Репрезентацийного Артистичного Ансамблю Польского Войска.