Сумар дня на 12. марця 2024 р.

Приносиме вам сумар медияльной ґрупы ЛЕМ.фм+ на ден 12. марця 2024 р.

Знимкы Низкого Бескіду в нові публикациі Станіслава Криціньского

Выдавництво «Ruthenus» поінформувало, што онедолга вкаже ся нова публикация авторства Станіслава Криціньского, буде то альбом зо знимкамы Низкого Бескіду. Книжка містит аж 350 стран з репродукциями понад сімстох чорно-білых знимок Низкого Бескіду, зробленых головні в 70. і 80. роках XX ст. з коментарями і дописками автора. Промоция альбому получена з авторском стрічом пройде 5. квітня/апріля в Едукацийно-Музейным Осередку Маґурского Нацийонального Парку в Крампній о 18.00 год. В часі стрічы автор публикациі оповіст про історию новой публикациі, істориі презентуваных знимок, а тіж і інспірациях, буде і час на дискусию. Окрем того в Осередку презентувана буде выстава выбраных фотоґрафій з нового альбому, котру охочы будут мочы обзерати до аж до мая того рока.

Про історию Нижнього Шлеска і Польковиц на стрічы з Лукашом Казек

Містецко-ґмінна Публична Бібльотека в Польковицях просит на авторску стрічу з журналистом і популяризатором наукы Лукашом Казек – автором многых публикаций, книжок і телевізийных проґрамів, в тым сериялю Таємниці Нижнього Шлеска. Як передал орґанізатор стрічы, віцебургомайстер Польковиц, буде она присвячена реґіонови Нижнього Шлеска і його мешканцям, в тым жытелям, котры ся гев оселили по 1945 році. То нагода для молодшых до наукы істориі через бесіду, зас старшы особы будут будут собі поспоминати давны часы. Стріча пройде в четвер, 21. марця о 17.00 год. в авдийовізуальній сали Бібліотекы. Вступ дармо, але чысло місц єст ограничене.

Кадры з Лемковины в нагородженым премійом Оскар фільмі

Вчера прошла 96. церемонія вручыня Нагорід Фільмовой Академіі в Лос Анджелес. Польско-американьско-бритийска продукция «Стрефа інтересів» режысериі Джонатана Ґлейзера отримала аж дві нагороды в катеґориі «найліпшый медженародный фільм» та «найліпшый звук». Пару сцен з нагородженого образу было крученых на Лемковині при заливі Климківка, краєвиды Низкого Бескіду сут тіж на фільмовым плякаті.

«Карпатска Писанка 2024»

Выгорлятскій Музей в Гуменным при спілпрацы з Окресном Орґанізацийом Уніі Жен Словациі просит на выставу «Карпатска Писанка 2024», зрыхтувану з нагоды закінчыня 32. едициі конкурсу на писанку. Того рока на выставі мож обзерати понад 500 писаных яєц од 59. авторів зо Словациі, Мадяр, Польщы і Украіны, котры зголосили ся до конкурсу. Конкурсовы працы были оціняны триособовом комісийом в складі Марош Демко, Мария Мішкова і Даґмар Унґрадійова. Выставу мож обзерати до 21. квітня/апріля.

Лемківско-Погіряньскій Великодній Ярмак

Припоминаме, што уж в найблизшу неділю 17. марця в Мазярскій Загороді в Лоси пройде Лемківско-Погіряньскій Великодній Ярмак. В проґрамі подіі не лем кєрмеш, але і варштаты выробів ручной роботы, писаня яєц, гафтуваня серветок ци робліня пауків і пальм. Будут тіж про великодні забавы, в тым культове «полюваня на яйця» – до зобраня буде 800 яєц – участ в конкурсі для діти в віку до 10 років. На ярмаку буде мож і спрібувати лемківскы стравы. Кєрмеш зачне ся о 11.00 год., вступ платный символичны 2 злоте.