Сумар дня на 12. марця 2021 р.

Приносиме вам сумар медияльной ґрупы ЛЕМ.фм+ на ден 12. марця 2021 р.

Новы реґіональны ограничыня в Польщы

Вчера, 11. марця, прошла конференция, в котрій Міністер Здоровля ПР Адам Нєдзєльскій передал інформациі тыкаючы актуальной епідемічной ситуациі і новых ограничынь. Розшыреный буде реґіональный локдавн. Має він тепер обовязувати в штырьох воєвідствах: в любушскым і мазовєцкым од 15. марця, в поморскым од 13. марця, ограничыня будут продолжены і в варміньско-мазурскым. Реґіональный локдавн має обовазувати до 28. марця і обнимати закрытя готелів, гандльовых ценрів, кін, музеів ци спортовых обєктів. Клясы 1-3 будут ся вчыти в гыбридовій формі. Як бесідувал міністер, актуально введы сут реґіональны ограничыня, але можливе, же в найблизшых тыжнях ограничыня зачнут обовязувати і в цілій Польщы. За причыну подал збільшыня чысла заражынь, што было вчера найвысше в третій фали. Інчом зміном, о якій повіл міністер Нєдзєльскій в часі конференциі, єст выняток в обовязку ношыня масок для осіб маючых проблемы з дыханьом, при чым мусят они товды мати при собі одповіднє засвідчыня. Спис хворіт, якы звільняют з ношыня масочкы, мож найти в розпоряджыню.

Одкрывают санаторі

Од вчера в Польщы, по долгій перерві спричыненій епідемічныма ограничынями, зас можут діяти санаториі. В сандецкым реґіоні найвеце такых місц находит ся в Креници і Мушыні. Курортникы мусят мати неґативный тест на COVID-19 або приняти вакцину. Як повіл шеф курорту Крениця Жеґєстів Вєслав Пюро, минулый період был для них особливо тяжкій, понеже хыбаль як єдиный курорт были обтяжены додатковым локдавном спричыненым червеном зоном. Тішат ся, же зас можут зачати діяльніст. Першы курортникы скєруваны Нацийональным Фондом Здоровля і Закладом Социяльных Убезпечынь мают трафити до курорту Крениця Жеґєстів 22. марця, наступна ґрупа 29. марця.

Несподіване одкрытя в креницкых лісах

Як каждого рока, на обшыри Надлісництва Пивнична ведена была інвентаризация лісовой звірины. Принесла она несподіваны результаты. В околицях Крениці явили ся бо два шакалі звычайны, еґзотичный ґатунок ниґда перше не обсервуваный на тым терені. Подібне одкрытя зробили лісникы пару років тому, коли нашли прожываючы на обшыри Пивничной єноты. Актуально в околици жыє уж около 20 єнотів. Тогорічна інвентаризация вказала тіж, што на обшыри надлісництва Пивнична жыє близко 10 лісовых котів, якы сут в Польщы під ґатунковом охороном. Найбільше чысло серед лісовой звірины творят єлені і сарны. На обшыри 40 тис. гектарів єст іх разом більше як 2 тисячы.

Роботы на шлаку з Устрик Выжніх на Цариньску Полонину

Од 10. марця одтинок червеного шляку з Устрик Выжніх на Цариньску Полонину єст закрытый для туристичного руху. Рішыня буде обовязувало до одкликаня. Як інформує Бєщадскій Нацийональный Парк, на початковым одтинку трасы будут проведены ремонтовы роботы, маючы на ціли зліпшыти доступ до пути для ратунковых служб. Працівникы Парку просят, жебы быти осторожныма і тримати ся рекомендаций тереновых служб. Покля што не знатя, коли одтинок буде зас одкрытый для туристів. Термін одркытя шляку буде поданый безпосередньо по завершыню робіт.