Сумар дня на 12. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 12. лютого/фебруара 2021 р.

Дослідникы Варшавского Університету противляют ся гейтови, якій впал на Вілямівян

На фейсбуковым профіли Центру Заанґажуваных Досліджынь над Культуровым Спадкобраньом, академіцкого осередка на Выділі «Artes Liberales» Варшавского Університету, што веде трансдисциплінарны досліджыня над культурами і языками, явило ся писмо тыкаюче ситуациі, в якій ся нашла в посліднім часі вілямівска меншына. В писмі дослідникы Центру противляют ся гейтови, якій в остатніх днях впал на ревітализаторів і хоснувателів вілямівского языка та жытелів Вілямовиц. Як сме перше інформували, в звязку з рішыньом піднятым в 2019 р. радныма ґміны, якє ся сопротивлят середовискам ЛҐБТ, стримане было дофінансуваня з Норвежскых Фондів на будову Музею Вілямівской Культуры. Фінансуваня не буде вернене, покля радны не одкличут схваліня. Мимо протестів зо стороны Стоваришыня Вілямівяне і бесід представників Центру з властями ґміны, радны не вернули рішыня. В звязку з тым, в порозумліню зо Стоваришыньом Вілямівяне, Центр завісил спілпрацу з властями і самоурядом ґміны Вілямовиці. В писмі працівникы Центру апелюют не лучыти поставы власти ґміны з ревітализаторами і хоснувателями вілямівского языка, якы в тій справі сут особливо пошкодуваны. Жертвами політикы власти ґміны сут особы негетеронормативны, зас дальша фаля социяльного гейту вдарила предовшыткым в локальных активістів та хоснувателів вілямівского языка з найстаршых і наймолодшых поколінь, якы дальшый раз досвідчают незрозумліня, одшмаріня і стиґматизациі.

Звязок Ґмін Ґорлицкой Землі подякувал о. Аркадийови Баранчукови

В середу 10. лютого/фебруара одбыла ся стріча Звязку Ґмін Ґорлицкой Землі. Окрем усталеного гармоноґраму, члены Звязку стрітили ся з о. Аркадийом Баранчуком. Священник был дотепер парохом православной парохіі в Ґладышові і директором Православного Осередка Милосердя Елеос. 1. лютого/фебруара о. Баранчук был звільненый зо вшыткых становиск перемышльско-ґорлицкой єпархіі і переходит в склад духовенства сусідньой лодзіньско-познаньской єпархіі. З той нагоды члены Звязку передали му желаня і подякуваня за рокы доброй спілпрацы на хосен локальной соспільности і неполносправных осіб. В імени соспільности ґорлицкой землі желаня зложыл ведучый Звязку Ґмін Ґорлицкой Землі Рафал Кукля, ведучый згромаджыня Ґжеґож Носаль та Війтове і Бургомайстрове вшыткых ґмін повіту.

Одпущыня податку для креницкых підметів

Бургомайстер Крениці Пьотр Рыба поінформувал, што Містецка Рада підняла схваліня в справі одпущыня податку од нерухомости за першы три місяці для підметів, якы ведут готелярскы услугы і діяльніст в обшыри ґондольовых і лыжных вытягів. Внескы в тій справі мож складати до 15. квітня/апріля тр. Додатково од 3. лютого/фебруара обовязує Заряджыня, якє тыкат складаня внесків о обнижыня предприємцям арендных оплат за наниманя і аренду. Внескы в тій справі мож складати до 25. лютого/фебруара тр.

Третє чысло маґазину «Одкрый Сандецкій Бескід»

Мож уж придбати третє выданя туристичного маґазину «Одкрый Сандецкій Бескід». По річній перерві з причыны епідеміі, часопис вертат в новій формі. Як бесідуют шефредакторка чысла Зузанна Длуґош і директор проєкту Конрад Роґозіньскій, поставлено тым разом на інтерактивніст выданя, в інтернетовій версиі находило ся буде вельо мотузків до інчых сайтів, мап, туристичных аплікаций та віртуальных прогульок. Маґазин чыслит 239 сторін, на котрых найдете ріжного рода статі тыкаючы зимовой темы. Третій номер маґазину мож придбати дармо, входячы на сайт выдавництва: www.odkryjbeskid.pl.

В Креници одкрыли комплекс Солотвины Арена

В Креници од днес зас буде діяла лыжна стация Солотвины Арена. Доступны мают быти вшыткы вытягы і трасы. Окрем того буде мож хоснувати оферту Снов Парку, ци лыжьной школы. Діяти будут і выпожычальні, а в реставрациі Солотвины Арена буде мож купити ідло на вынос. Одкыта буде тіж креницка видокова вежа.