Сумар дня на 12. липця/юлия 2024 р.

Приносиме вам сумар медияльной ґрупы ЛЕМ.фм+ на ден 12. липця/юлия 2024 р.

ХІІІ Русиньска Ватра в Малым Липнику на Пряшівскій Руси

Уж днес зачынат ся ХІІІ Русиньска Ватра в Малым Липнику на Пряшівскій Руси. Проґрам зачне ся по 18.00 год. Буде перегляд дітячых фольклорных колективів і лавреатів послідніх річників фестівалю «Співы мого роду». Звіздом вечера буде русиньскій солиста Штефан Штець, якій выступит зо свойом ґрупом Файта. Суботній проґрам на головній сцені зачне ся о год. 16.30. В тот ден выступлят колективы з реґіону і близкой околиці, як і тоты з кус дальшой, м.ін. Черговчан з Бардийова, Маковиця зо Свидника, ци Борєвка з Кошыц. Кульмінацийным пунктом суботнього проґраму буде великє паліня ватры. Пак буде забава з народном музиком і фольклорныма колективами. Не бракне і додатковых атракций, такых як выстава фороґрафій Міляна Маласта «Молитва дерева», дротарскы творчы варштаты ци школа танця. Окрем того буде мож послухати про язык як част достоменности народу ци переміны русиньского облечыня в просторі і часі. В ґастрозоні буде мож скоштувати реґіональне ідло. Буде і специяльна зона для діти, де активности для наймолодшых будут вести акторы з Театру Александра Духновича. В неділю, послідній ден ватры, в грекокатолицкым храмі святых Космы і Даміяна одслужена буде Літургія, а пак духовны пісні заспіват Івана Бріллова.

Марш Автономіі Шлеска

Заран, 13. липця/юлия, улицями Катовиц пройде Марш Автономіі Шлеска. Госло тогорічнго маршу звучыт «То мы, шлезскій нарід». Як подал лідер Руху Автономіі Шлеска Єжы Ґожелік, сут ближе як коли скорше сполніня єдного з іх ключовых постулятів, т.є. вызнаня шлезского языка, а може і барже амбітного постуляту, якым єст вызнаня шлезской етнічной меншыны. Госло тогорічного маршу одкликує ся до почутя ґруповой окремости, котра в іх переконаню повинна быти оддзеркалена в одповідніх переписах права. Подля Ґожеліка, по рішыню президента Анджея Дуды, котрый заветувал закон вызнаючый шлезскій як реґіональный язык, треба піти о крок дальше і прібувати переконати політиків і соспільство до вызнаня Шлезаків за єтнічну меншыну. Припомнийме, што в меншыновым законі записаны сут штырі етнічны меншыны: лемківска, караімска, ромска і татарска, девят нацийональных меншын і єден реґіональный (кашебскій) язык. Марш Автономіі Шлеска одбыват ся в Катовицях од 2007 р. Все єст орґанізуваный в околици 15. липця/юлия – того дня в 1920 р. схвалено орґанічный статут шлезского воєвідства, надаючый реґіонови автономію м.ін. в фінансовых квестиях.

Консультациі на тему польско-словацкой спілпрацы Інтерреґ

Спільный Секретарият Проґраму Інтерреґ Польща-Словация орґанізує консультациі на тему будучого проґраму трансграничной спілпрацы Інтерреґ на польско-словацкым пограничы. В консультациях можут взяти участ жытелі і вшыткы заінтересуваны розвитком тых обшыри. Результаты послужат до опрацуваня дальшой едициі проґаму, т.є. по 2027 році. Зрыхтуваны сут дві окремы анкєты – єдна направлена на інституциі і друга для жытелів. Мож іх выполнити онляйн до кінця серпня/авґуста тр. Дотля европейскы середкы помогли створити в рамках Проґраму Інтерреґ Польща-Словация понад 3000 км трансграничных туристичных шляків, одновити 480 інфраструктуральных обєктів ци змодернізувати близко 200 км доріг.

Сезоновый автобус Коросно – Івонич – Рыманів

Вернуло вакацийне автобусове получыня з Коросна до Івонича і Рыманова. Автобус буде курсувал в кажду суботу, неділю і свято, аж до 1. вересня/септембра. Зреализує по штырі курсы в обох напрямах: з Коросна медже 10.00 і 18.00, а з Івонича і Рыманова медже 11.00 і 19.30. Полный розкад находит ся на вебсайті MKS Коросно.