Сумар дня на 12. липця/юлия 2022 р.

Приносиме вам сумар медияльной ґрупы ЛЕМ.фм+ на ден 12. липця/юлия 2022 р.

Выокремлят ґеном Лемків

Інститут Біоорґанічной Хіміі Польской Академіі Знань вєдно з Познаньском Політехніком реализуют проєкт, цілю котрого є створити ґеномічну мапу Польщы, значыт мапу ґенетичной змінности. Дослідникы хотят провірити, ци і як барз ріжниме ся од ся під ґенетичным оглядом, беручы до увагы баданя нацийональных меншын. Пробкы побераны будут тіж од Лемків. Анализуваный буде ґеном, значыт комплетна ґенетична інформация. Пробкы ДНА, взяты зо слины, побераны будут дармо, а кажда особа отримат дрібницьовый рапорт з інформациями, одкале походили єй ґенетичны предкы, напр. з якой части Европы. Подібны баданя мож зробити в приватных осередках, але іх кошт то пару, а аж і парунадцет тисячы золотых. Науковці побрали уж пробкы од Шлезаків, тепер поберают од Кашебів. Будеме інформувати, коли і де буде могла бадати ся лемківска меншына.

Фінансова поміч для здібной лемківской молодежы

Товариство для Розвитку Музею Лемківской Культуры оголосило набір кандидатів до стипендий Лемківского Стипендийного Фонду ім. Івана Русенка. Жебы старати ся о таку стипендию, треба быти тогорічным матуристом, найти ся на списку принятых на студиі єдной з публичных высшых шкіл – університетів, політехнік ітп. в Польщы і сполнити пару додаковых вымогів. Стипендия выносит 700 зл місячні през цілый І рік студиюваня, комплет документів треба зложыти до 9. серпня/авґуста. Цілю Лемківского Стипендийного Фонду ім. Івана Русенка є фінансово підперти здібных Лемків і пропаґувати доробок Івана Русенка серед лемківской молодежы. Полну інформацию про вшыткы вымогы і потрібны до зложыня документы найдете на сайті zyndranowa.org та на нашым портали.

Синод Єпископів Украіньской Грекокатолицкой Церкви в Перемышли

До 15. липця/юлия потырват Синод Єпископів Украіньской Грекокатолицкой Церкви під ведіньом архієпископа кыівско-галицкого Святослава Шевчука. Синод проходит не в Кыйові, а в Перемышли, з причыны воєнных діянь на Украіні. Синод зачал ся 7. липця/юлия. Серед його гости є м.ін. апостольскій нунций в Польшы архієпископ Сальваторе Пеннакіо, архієпископ сеньор перемышльской єпархіі Осиф Михалик та ново менуваный амбасадор Украіны в Польщы Василь Зварич. Лем перша робоча стріча была одкрыта, товды забрали голос прошены гості, дальшы синодальны стрічы сут заперты. Духовенство зобране в Перемышли бесідує о теперішній ситуациі Цекрви на Украіні. Украіньска Грекокатолицка Церков є найвекшым католицкым східнім Костелом на світі.

Карпатскій Реґіон повекшыт ся о місто Стропків

Місто Стропків хоче вступити до медженародного здружыня Карпатскій Реґіон з центром в Ряшові. Орґанізация діє уж 30 років, а його членами сут самоурядовы єдиниці з малопольского і підкарпатского воєвідств, але од 2020 рока має і меджедержавный засяг. Першыма членами здружыня зо Словациі по зміні статуту были місто Спишскє Подрадя, села Земплиньскы Гамры, Малый Шариш, але і русиньскы Словінкы на Спишы. Карпатскій Реґіон в перспективі 2021-2027 буде одповідальный за ведіня проєктів в рамках пріоритету Творче і туристичні атракцийне погранича в рамках проґраму Іnterreg PLSK 2021-2027. Для Стропкова найважнійшом цілю діяня в рамках Карпатского Реґіону буде вытворити і пропаґувати карпатскє означыня Carpathia і його сеґментів Hiking UNESCO, Vine ци EthnoCarpathia.