Сумар дня на 12. липця/юлия 2021 р.

Приносиме вам сумар медияльной ґрупы ЛЕМ.фм+ на ден 12. липця/юлия 2021 р.

Слова міністра Чарнка незгідны з правами нацийональных меншын

На тему проєкту новелизациі закону Право Освітове, над якым працує Міністерство Едукациі і Наукы, бесідувал для телевізиі TVP Іnfo 4. липця/юлия шеф ресорту шкільництва Пшемыслав Чарнек. Новелизация має ввести векшый як дотля надзір кураторів над школами. Як подал Чарнек, діяня тоты мают на ціли стримати деморализацию діти і молодежы в польскых школах. За примір орґанізаций, якы входят до шкіл і деморализуют діти, подал м.ін. тоты, якы нп. на Шлеску, нибы вчат німецкого языка, а так направду вчат діти німецкой істориі Шлеска. Змінам в законі о педаґоґічным надзорі сопротивила ся м.ін. меншынова сторона Спільной Комісиі Уряду та Нацийональных і Етнічных Меншын. Як подали на своім фейсбуковым профіли, слова Чарнка сут незгідны з правами нацийональных меншын, Европейском Картом реґіональных або меншыновых языків, а направлены конкретно проти німецкій меншыні. Змінам в Освітовым Законі сопротивили ся і многы самоуряды та представникы шкільництва.

Конференция памяти Антония Годинкы в Будапешті

Вседержавне Общество Русиньской Інтеліґенциі ім. Антония Годинкы, Столичне Русиньскє Нацийональне Самосправуваня і Русиньскы Самосправуваня VI і VIII рейонів Будапешту просят на наукову конференцию посвячену памяти Антония Годинкы, яка пройде в пятницю, 16. липця/юлия, о 15.00 год. в культурным центрі в Будапешті. В проґрамі м.ін. вступне слово др. Штефана Лявинця, председы Вседержавного Общества Русиньской Інтеліґенциі, нагороджыня лавреатів преміі ім. Антония Годинкы 2021 рока, выклады медженародной конференциі ци презентация русиньскых выдавництв.

Выріжнены в конкурсі «Малопольскє Село 2021»

480 тис. злотых трафит до ґмін, котрых села были выріжнены в конкурсі «Малопольскє Село 2021». Цілю конкурсу єст м.ін. промувати інновацийны діяня для зміны образу села, хоронити культурову дідовизну, заохочувати локальны соспільства до активного діяня для піднесіня атракцийоности малопольского села і поправы жытя його жытелів. Села мож было зголошувати до конкурсу в трьох катеґориях: Найкрасше Малопольскє Село, Новаторскє Малопольскє Село та Малопольскє Село в Сіти. В катеґориі Найкрасше Малопольскє Село перше місце занял Поворозник в ґміні Мушына, за што отримал 60 тис. злотых фінансовой підпоры. 10 тис. злотых трафит до выріжненых в тій самій катеґориі Квятоновиц в ґміні Ґорлиці.

Поломництва на Святу Гору Явір

Днес, подійом пн. «Реліґійне жытя Лемків», зачынат ся грекокатолицкє поломництво на Святу Гору Явір. Стріча пройде о год. 15.30 в Музею Маґурского Нацийонального Парку в Крампній. Завершыньом поломництва буде Понтифікальна Божеска Літургія на Святій Горі Явір в пятницю, 16. липця/юлия. Так само днес кінчыт ся 31. Православне піше поломництво на Св. Гору Явір. Поломникы вышли в суботу, 10. липця/юлия, з Ґорлиц і перешли м.ін. через Маластівску Маґуру, Ґладышів, Реґєтів, Ганчову і Высову. Днес дошли на Святу Гору Явір молити ся на Святій Літургіі в праздник свв. Апостолів Петра і Павла.