Сумар дня на 12. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 12. квітня/апріля 2022 р.

Словация зменшат ковідовы рестрикциі

Словация резиґнує з ограничынь звязаных з коронавірусом. Од 6. квітня/апріля словацкы власти зрезиґнували з обовязковой реґістрациі осіб, якы хотіли віхати на обшыр державы, знесли кварантанну для тых, якы не приняли вакцины, і конечніст вказувати ковідовы пашпорты. Фурт єднак обовязуют масочкы в публичных запертых просторах, такых як склепы, уряды, спортовы ци культурны обєкты, та вчас масовых подій, а тіж в публичным транспорті. Вшыткы польско-словацкы граничны переходы для особового і товарового руху сут наново одкрыты. Роверисты сміло можут хоснувати біциґльовы лавкы на трасі EuroVelo 11, якы получыли русиньскы села по обох странах границі.

Літні варштаты Карпаторусиньского Дослідничого Центра

Карпаторусиньскій Дослідничый Центр просит молодых науковців аплікувати на першы орґанізуваны Центром літні варштаты. Заплянуваны сут конверсациі, выклады, семінары і мастерскы курсы направлены на студентів, докторантів і молодых специялистів, якы мают дослідниче заінтересуваня в обшыри Карпаторусиньскых Студий. Варштаты одбудут ся в днях од 27. до 31. мая тр. на Університеті в Торонто. Участникы варштатів будут менторуваны факультетом Карпаторусиньского Дослідничого Центра і будут розвивати свою працу в Paul Robert Magocsi Carpatho-Ruthenica Collection. Вшыткы участникы літніх варштатів отримают стипендию, котра покрыє кошты нічлігу, ідла і подорожы. Апліканты можут ся зголошувати до проґраму іщы до 22. квітня/апріля. До зголошыня треба долучыти опис своіх дослідничых заінтересувань і коротку біоґрафію. Дрібниці найдете на фейсбуковым сайті Центра.

Нова «Бесіда»

Мож уж придбати дальшый номер часопису Стоваришыня Лемків «Бесіда» за місяці марец/квітен. Чысло припоминат о ближучых ся Великодніх Святах, а тіж о 75. річници выгнаня з рідной Лемковины. В «Бесіді» прочытаме м.ін. про ґорлицкого бурсака доктора габілітуваного Павла Малецкого і зобраня членів Руской Бурсы, а тіж про ювілей, 70. річницю народжыня Павла Стафиняка. В часописі поміщены і дописы про округлы річниці народжыня Семана Мадзеляна і Павла Стефановского. Інчый допис тыкат заскаржыя омбудсманом новелизациі, яка зблокувала зворот лемківскых лісів. В новым выданю сут і комунікаты, котры были выданы лемківскыма/русиньскыма орґанізациями проти напасти Росийской Федерациі на Украіну. Стоваришыня Лемків інформує і о акциі «Лемкы Украіні», збірці фондів на гуманіtарну поміч жытелям Украіны. В звязку з блужучом ся 75. річницьом початку Акциі «Вісла» Стоваришыня припоминат і кличе на упамятніня, якы пройдут 30. квітня/апріля в Біличній, Устю Рускым і Рускій Бурсі в Ґорлицях.

Церкви в ґміні Команча отримали дофінансуваня на консерваторскы роботы

На консервацию забытковых обєктів на Підкарпатю передано в тым році понад 9 млн злотых. Дофінансуваня отримало 230 обєктів. Понад 700 тис. злотых было передане на реновацию забытків в Бєщадах і Низкым Бескіді, в тым на обшыри ґміны Команча. Дофінансуваня консерваторскых робіт в ґміні Команча отримали м.ін. церкви в Радошыцях, Смільнику, Репеди, Туряньску і Щавным.