Сумар дня на 12. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 12. квітня/апріля 2021 р.

Проходит Нацийональне Повселюдне Списуваня Жытелів і Мешкань 2021

1. квітня/апріля рушыло в Польщы Нацийональне Повселюдне Списуваня Жытелів і Мешкань 2021. Має оно пройти головні в формі інтернетового самосписуваня. Уж од початку акциі явили ся даякы проблемы, бракувало нп. одповідніх діакритичных знаків, якы не выступуют в польскій азбуці, зато члены ріжных меншын не могли правильні подати своє мено і назвиско. Як першый проблем зголосил Матевиш Тітес Меєр з Кашебской Єдноты. Підпорили го м.ін. представникы караімской, ромской ци шлезской меншын. Інчыма проблемами были перетяжыня серверів і авария систему ePUAP. Вказало ся і, што як хтоси знат наш номер PESEL i родове назвиско матери, може залоґувати ся на сайті списуваня за нас. В такым припадку злочын треба зголосити. В середу, 7. квтіня/апріля, Маршалківскій Уряд Малопольского Воєвідства орґанізувал онляйн конференцию для представників меншын з представниками Статистичного Уряду. Зо страны лемківской меншыны присутна была Наталия Малецка-Новак, ведуча Стоваришыня «Руска Бурса» в Ґорлицях. Омовлена была аплікация списуваня, м.ін. безпека даных. Як ґарантували робітникы Уряду, даны сут каждоразово анонімізуваны і шыфруваны, обняты статистичном таємницьом, а за іх неправне хоснуваня горозит кара вязниці. Актуально списуваня проходит лем онляйн, телефонічні буде ся мож списати од 4. мая тр. З огляду на пандемію, теренове списуваня єст стримане до одкликаня. Списуваня потырват до кінця вересня/септембра тр. Заохочаме одважно подавати свою нацийональніст і рідный язык.

Контролюют дотримуваня санітарных ограничынь

В цілій Польщы ведены сут контролі дотримуваня санітарных ограничынь, спричыненых пандемійом коронавіруса. Як поінформувал в минулу пятницю порталь gorlice24.pl, протягом пятьох дни функцийонеры інтервеніювали понад 100 разів лем в примірі осіб не дотримуючых обовязку закрывати ґамбу і ніс в публичным просторі. В більше як 70 припадках інтервенциі скінчыли ся мандатами, в 11 поліциянты зробили запискы, яку будут основом поданя внеску о кару до суду. За брак масочкы в публичным просторі горозит мандат до 500 злотых. Функцийонеры контролювали тіж гандльовы і услуговы обєкты, якы подля обовязуючых ограничынь винны быти закрыты. Не однотували ниякых нарушынь звязаных з дотримуваньом санітарных ограничынь.

Креницкы біциґльовы подіі 2021

Бургомайстер Крениці Пьотр Рыба поінформувал на своім фейсбуковым профіли, што в минулый вікенд одбыли ся в Креници біциґльовы змаганя MTБ Polish Cup «Бігы о Перлину Польскых Курортів», якых траса проходила м.ін. креницкым дептаком і Парковом Гором. В подіі взяло участ більше як 400 участників, якы бороли ся в ріжных віковых катеґориях. Змаганя одкрыли цикль біциґльовых подій, якы в тым році будут орґанізуваны в Креници. На червец/юній плянуваный єст Фестіваль Doka Downhill City Tour, а на вересен/септембер Grand Prix MTБ.

Природникы апелюют не выпаляти трав

Маґурскій Нацийональный Парк припомнул на своім фейсбуковым профіли о неґативных консеквенциях выпаляня трав, якє часто одбыват ся ярю. За природниками з Парку, в часі выпаляня трав гынут звірята, якы жыют і кормлят ся на луках. Выпаляня нищыт тіж верству гумусу в земли, што неґативно влият на рослины. Часто може перейти в пожар, небезпечный для люди і ґаздівок та цінных лісовых і нелісовых екосистемів. В Маґурскым Нацийональным Парку така ситуация была перед великодніма вакациями. На щестя скоро зареаґували пожарникы і повело ся уникнути пошыріня пожару. Природникы просят не выпаляти трав і памятати, што пожар нищыт вшытко на своій дорозі.