Сумар дня на 12. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 12. грудня/децембра 2024 р.

Ґорлицкы ученикы в Пряшові

Вчера, 11. грудня/децембра Інститут Русиньского Языка і Культуры одвиділи ученикы зо середньой школы в Ґорлицях з учытельком лемківского языка Моніком Тылявском і Наталийом Малецком-Новак, ведучом Стоваришыня «Руска Бурса» в Ґорлицях. Лемківскы ученикы в рамках свойой екскурсиі по русиньскых інституциях в Пряшові виділи тіж Театр Александра Духновича і Словацкій Нацийональный Музей – Музей Русиньской Культуры в Пряшові. Школярям была представлена робота і діяльніст русиньского Інституту, а при тым презентуваны можливости студиюваня русиньского языка і літературы на Пряшівскым Університеті.

Пролджат будова новой церкви в Ґладышові

Продолжат будова новой прaвославной церкви в Ґладышові, а вы фурт можете підпорити ініциятиву. Як інформувал о. Ярослав Ґрич, парох ґладышівской церкви, з кінцьом рока каждый з нас годен подумати о переказаню даровизны на будову ґладышівского храму, што корыстні може вплынути на пізнійше розрахуваня з фіскуском. На тот момент повело ся в цілости вкрыти дах над храмом вірных і частично мідяном бляхом над престолом. Вшыткы потріны інформациі – як помочы, мож найти м.ін. на фейсбуковым фанпейжды будовы православной церкви в Ґладышові, або на сайті Осередка Елеос в Ґладышові. Нова церков є репліком неістнуючой деревяной церкви з Незнайовой.

Одбыла ся авторска стріча з Юрийом Стариньскым

В мунилый понедільок во Вроцлаві одбыла ся стріча промуюча публикацию «Переселили нас мусово. Листы Лемків з років 1947-1948» під редакцийом Юрия Стариньского. Авторску стрічу з ведучым Лемківского Ансамблю Пісні і Танця «Кычера» вюл проф. др габ. Ростислав Жерелик. В дискусиі взяли участ науковы працівникы Вроцлавского Унiверситету, проф. Ярослав Сырник, др габ. Малґожата Мiсяк, др габ. Павел Коробчак i др Монiка Шевчык з Ягайлоньского Унiверситету. Участ в бесіді брали тіж присутны на публиці. Книжка печатана єст в двох томах – то выбір автентичных листів Лемків, в котрых описуют они драматичны подіі звязаны з выганяньом. Становлят свідоцтво выселінь і кривд, якых дознали. Подія одбыла ся в Рефектажы Нацийонального Закладу ім. Оссоліньскых во Вроцлаві.

В Уряді ПСК бесідувано о словацко-польскій спілпрацы

В Уряді Пряшівского Самосправного Краю (ПСК) в четвер 5. грудня/децембра стрітила ся Словацко-Польска Комісія дс. черезграничной спілпрацы. ПСК привитал представників малопольского і підкарпатского воєвідств, Ґенерального Консуляту Словацкой Республикы в Кракові, Сполочного технічного секретарияту Краків, Жыліньского Самосправного Краю і дальшых партнерів. Вчас стрічы занимано ся ріжныма темами, медже інчыма сполочном черезграничом стратеґійом і дальшыма проєктами. В центрі заінтересуваня были головно медженародны дороговы коридоры і публичный транспорт в приграничы. Участникы медже тым підсумували дотеперішні активности в рамках свойой спілпрацы і реализацию Проґраму Interreg Польща – Словация 2021-2027, включно Фонду малых проєктів. Заміряли ся так само на підготовліня проґрамового періоду по 2027 р.