Сумар дня на 12. червця/юнія 2023 р.

Приносиме вам сумар медияльной ґрупы ЛЕМ.фм+ на ден 12. червця/юнія 2023 р.

Русины одсвяткували Ден Русинів Словациі

Днес в русиньскым театрі в Пряшові проходит шторічный декляматорскій конкурс Духновичів Пряшів. Єст то послідній пункт тогорічных святкувянь в рамках Дня Русинів Словациі. Головны святкуваня нацийонального свята прошли вчера, 11. червця/юнія в Свиднику і зачали ся двома богослужынями – православным і грекокатолицкым, правлена была і панахіда при гробі будителя Александра Павловича. По торжественным поході через місто в народных кроях і ґаля-концерті, торжества перенесли ся до Тополі, де народил ся Александер Духнович і де находит ся пропамятна таблиця в чест будителя. Локально одзначыли свято і ден перше в Меджелабірцях.

Одкыта 11. Медженародна Літня Школа Русиньского Языка і Культуры

Вчера, 11. червця/юнія, по трирічній вымушеній перерві, в Інституті Русиньского Языка і Культуры Пряшівского Університету прошло святочне одкрытя 11. річника Медженародной Літньой Школы Русиньского Языка і Культуры Studium Carpatho-Ruthenorum 2023. Тогорічна літня школа потырват до 1. липця/юлия. Studium Carpato-Ruthenorum то едукацийный проґрам заміряный на вчыня русиньского языка, істориі, літературы, культуры і етноґрафіі карпатскых Русинів. В проґрамі сут і выіздовы прогулькы, тіж на Лемковину. Лекциі ведены сут в русиньскым і анґлицкым языках і берут в них участ ученикы з ріжных держав. Інститут Русиньского Языка і Культуры Пряшівского Університету реализує проґрам од 2009 рока. Є то єдина того рода школа на світі.

Локальне споминаня свв. Мучеників Холмскых і Підляшскых в Святковій Великій

В суботу 10. червця/юнія, згідні з традицийом, прошло православне богослужыня в Святковій Великій. Літургію очелювал архієпископ перемышльско-ґорлицкій Паісий в асисті єпархіяльного духовенства. Літургія была одслужена на поляні близко придорожной капличкы, з нагоды локального споминаня свв. Мучеників Холмскых і Підляшскых, особливо о. мученика Павла (Швайко) і мучениці імости Йоанны, котры перед тым як трафили на Холмщыну, несли послугу на Лемковині. При каплици, яка ся находит коло поляны, св. Павел Швайко правил богослужыня в меджевоєнным періоді для православных Лемків.

Новы можливости студиюваня про Русинів

Інститут Русиньского Языка і Культуры Центра Языків і Культур Нацийональных Меншын Пряшівского Університету звертат увагу на новы можливости студиюваня про авсольвентів маґістерскых проґрамів, і про Русинів. Абсольвенты маґістерскых філолоґічных студий, в першым ряді (східньо)славяньскых языків, а тіж авсольвенты овладаючы русиньскій язык або його вариянты мают можливіст приголосити ся на 3-річну стацийонарну форму навчаня на докторскым проґрамі Славістика – русиньскій язык і література. На основі оціны творчой активности працівників, Інститутови признано єдно місце про інтерного докторанта од 1. вересня/септембра тр. Докторантови буде выплачана стипендия з пляну обновы Словацкой Республикы, т.є. з фінансів Европейской Уніі, в рамках вызвы на підпору выдатных докторантів. В Інституті вірят, же Вызва ословит тых абсольвентів, котрых інтересує русиністика і перспектива науково-педаґоґічной роботы в тій обшыри. Набір єст одкрытый лем до днес, 12. червця/юнія.