Сумар дня на 11. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 11. вересня/септембра 2024 р.

Віцеміністер Шыманьскій стрітил ся з меншынами

Томаш Шыманьскій, секретар стану в Міністерстві Внутрішніх Справ і Адміністрациі был в понедільок 9. вересня/септембра гостьом ІІІ звычайной сесиі Соймику Любушского Воєвідства. Будучы в Зеленій Горі, стіртил ся тіж з представниками нацийональных і етнічных меншын. Бесідували о проблемах з фінансуваньом меншыновых проєктів, блудах в Повселюдным Списі ци дискримінациі в медиях. Присутны были м.ін. Ізабеля Яськовяк з Ромского Освітового Товариства «Гаранґос» ци о. Артур Ґрабан зо Стоваришыня Лемко Тавер. Вчас бесіды віцеміністер Шыманьскій повіл, же уряд робит над новым реґуляміном, котрый тыкат признаваня дотаций – має заґарантувати одповіднє фінансове підпертя меншын і розвиток етнічных ґруп. «Будеме хотіти преміювати тоты культурны, едукаицйны ци освітовы подіі, котры сут найліпшы і становлят о достоменности даной меншыны, і котры сут ефективны, трафляют до найвекшого чысла осіб» – повіл міністер.

Рускій Клюб 1923 не устає в пробах одзысканя будинку в центрі Пряшова – Руского Дому

В четвер 5. вересня/септембра в Пряшові одбыла ся членьска громада єдной з найстаршых фунґуючых русиньскых орґанізаций на Словациі – Руского Клюбу 1923. Актуальным председом орґанізациі є Федор Віцо, попереднім были Анна Ґальова і Гавриіл Бескід. Віцо вюл діяльніст Клюбу за 2022 і 2023 рік. Дотепер не повело ся тій орґанізациі здобыти доступ до Руского Дому, будинку в центрі міста, якій находит ся в Пряшові, і котрый, історичні, был маєтком як раз той орґанізациі. Місце тото полнило перед войонм функцию народного дому русиньской меншыны. Спір о тот маєток тырват од 2005 рока, коли то была нелеґально основана друга орґанізация під назвом Рускій Клюб 1923, яка, уж як Фундация Рускій Клюб 1923, переняла будовлю. Перед парома роками суд рішыл, што єдином леґальном орґанізацийом є тота основана в 1923 році. Рускій Клюб буде дале старал ся одзыскати будинок.

В Йонкерс упамятнили 110. річницю народин лемківского святого

Центральны празднуваня в памят лемківского священномученика Максима проходили 6. вересня/септембра в Катедрі св. Тройці в Ґорлицях, єднак і еміґрацийны кругы в ЗША зышли ся, штобы молитовно спомнути святого Максима Ґорлицкого. Подія одбыла ся 8. вересня/септембра в Йонкерс, єй орґанізатором был Андрий Медвід, лемківскій еміґрацийный діяч, якій позитивно підсумувал стрічу.

Нове авто для Варштатів Терапіі Занятями Православного Осередка Милосердя Елеос Перемышльско-Ґорлицкой Єпархіі

Православный Осередок Милосердя Елеос Перемышльско-Ґорлицкой Єпархіі отримал дофінансуваня проєкту проґраму вырівнуваня ріжниц медже реґіонами, завдякы чому закупил специяльного буса до перевозу осіб з неполносправностями. Авто буде хоснуване до перевожыня осіб, якы сут участниками Варштатів Терапіі Занятями, котры діют при Елеосі. Варштаты Терапіі Занятями зосереджают 20 осіб з обшыри ґорлицкого повіту. Цілю Варштатів є рыхтуваня участників варштатів до самодільного жытя, через професийну і социяльну регабілітацию.

Фот. Facebook WTZ przy Prawosławnym Ośrodku Miłosierdzia ELEOS w Gładyszowie