Сумар дня на 11. січня/януара 2023 р.

Приносиме вам сумар медияльной ґрупы ЛЕМ.фм+ на ден 10. січня/януара 2023 р.

Карвациян для бывшого директора Карвациянів

В неділю 9. січня/януара одбыла ся торжественна ґаля вручыня нагороды власти міста Ґорлиці Дерслава Карвацияна, котру отримал бывшый директор Музею Дворы Карвациянів і Ґладышів в Ґорлицях Здзіслав Толь. Лявдацию выголосил проф. др габ. Кжыштоф Томальскій, Ґорличан з походжыня, маляр і ґрафік. Найвысше выріжніня бургомайстра містра Ґорлиці признано Здзіславови Тольови в подякуваню за жытьовый доробок і выдатны заслугы для міста. Было то і символичным звінчыньом професийной дорогы З. Толя, якій як раз по долгых роках роботы перешол на пенсию. Здзіслав Толь од 1983 р. звязаный был з днешнім Музейом Дворы Карвациянів і Ґладышів – был м.ін. ініциятором і спілавтором концепциі одбудовы Двору Карвациянів, а пак долголітнім орґанізатором роботы новой ґалериі штукы. Зорґанізувал соткы выстав і інчых подій, што піднесли рівен ґорлицкой культуры. Окрем професийных директорскых обовязків, активні занимал і занимат ся дальше різбом. Є автором м.ін. різбы Бортняньского в Бортным.

Церков з новым ґонтом

Бывша грекокатолицка церков в Розтоці Великій переходит малый ремонт. Выміняный єст ґонт на храмі. Його стан был уж на тілько злый, што місцевый парох о. Войцєх Охалік рішыл поглядати дофінансуваня на його цілковиту выміну. Повело ся завдякы дофінансуваню з проєкту «Дерево єст з ліса» Державных Лісів. Дотация высокости 100 тис. зл дозволила покрыти половину коштів выміны деревяных ґонтів, другє піл забезпечыла парохія зо своіх середків. Роботы рушыли кінцьом листопада/новембра 2022 р. і помалы ся завершают. Церков св. Димитрия вознесена была в 1819 році през лемківску громаду. Од 1947 рока хоснувана є як римокатолицкій костел – дочырній костел парохіі Матери Божой Ангельской в Новій Веси. Церков в Розтоці была ремонтувана в 1881 і в 1938 році.

В Старій Любовни был успішный рік

Град і скансен в Старій Любовни, в котрым находят ся і скарбы русиньской деревяной архітектуры, одвиділо минулого рока веце як 182 тис. туристів. Є то о 20 тис. веце як в 2021 році. Домінували туристы зо Словациі, але по пандемічных роках вертат рух з Польщы. За найвекшу подію 2022 рока директор інституциі вважат стрічу потомків маітелів замку. Явила ся і нова постійна експозиция з назвом «Град Любовня – град кралів і старостів». Протягом рока інституция орґанізувала ріжны культурны подіі. Музей выдал тіж нову публикацию – четверте продолжыня ентоґрафічных записів Яна Лазорика, а колекция музею збогатила ся о портреты од мадярского потомка роду Раісовых. Святочне одкрытя тогорічного сезону пройде в послідній вікенд квітня/апріля. Єдном з выстав заплянуваных на 2023 рік є выстава «Кральовны Ендія» во спілпрацы з Музейом Енді Варголя в Меджелабірцях. В пляні музею є тіж одновити част музейных меблів-експонатів, скінчыти пілнічно-східню твердыню і зробити презентацию войсковых касарен.

Жолніры для припомніня про битву

В остатнім часі до новобудуваного Історичного Парку в Сярах трафили черговы елементы – то фіґуры жолнірів. Іх «задачом» є, жебы тото місце асоциювало ся з Битвом під Ґорлицями. В сусідстві жолнірів замонтували іщы дві альтаны. Кус дале поміщены были елементы для діти, медже інчыма колыска Нютона. Появили ся і табличкы описуючы черговы атракциі, котры замонтуют в парку. Серед них сут кривы дзеркала, перископ, глухій телефон. Векшіст выпосажыня єст іщы забезпечена фолийом і жде на ліпшу погоду. За історичным парком орґанізуют тіж природничый кутик, з альтаном на воді, гамаками і алейком обсадженом деревами, котрых голузя заплітат ся над дорогом творячы повалу. Будовляны роботы мают скінчыти іщы того рока, ціліст має коштувати два млн зл.

Фот. УМ Ґорлиці