Сумар дня на 11. січня/януара 2022 р.

Приносиме вам сумар медияльной ґрупы ЛЕМ.фм+ на ден 11. січня/януара 2022 р.

Новый рік і новы інвестициі в курортній ґміні Пивнична

Самоуряд ґміны Пивнична рішыл, як заґаздує місце на горі Кіцаж. При плянуваню смотріли на атракциі, што ся находят на положеній недалеко горі Венґєльник. На Кіцажы побудуют камінны пішо-роверовы трасы, што выпосажены будут в лавкы і колибы, так жебы в часі подорожы мож было пристанути і пообзерати ляндшафты. Як передал бургомайстер Пивничной, Дариюш Хоружык, проєкт єст уж готовый, сут тіж і забезпечены грошы на його реализацию в рамках проєкту реализуваного Звязком Креницко-Попрадскых Ґмін. Лишыло ся уж лем оголосити конкурс оферт і ждати на ефекты. Ціла інвестиция коштувала буде около 2,8 млн зл. Разом з плянуваньом новой атракциі вернула тема будовы лыжной стациі на горі Кіцаж. Закля што тота інвестиция лишат ся в стрефі плянуваня.

Креницка ґрупа ҐОПР того рока буде празднувала 70-літя

В минулым тыжны Маршалок Малопольского Воєвідства Вітольд Козловскій стрітил ся в Креници з ратівниками креницкой ґрупы ҐОПР. В часі стрічы бесідували м.ін. о припадаючым на тот рік ювілею 70-літя ґрупы і звязаных з ним святкуванях, але тіж потребах креницкой ґрупы, як і можливых на тот і будучы рокы інвестициях. Як підкрислил маршалок, поправа ефективности діяня служб, котры одповідают за безпеку туристів і жытелів Малопольщы, єст для воєвідства барз важна. Безпечный реґіон то атракцийна туристичні обшыр, а для такых місц як Крениця добрый імідж то основа.

В Бєщадах буде іздило більше автобусів

Бєщадскій Звязок Комунікациі (БЗК) отримал од підкарпатского воєводы дофінансуваня в высокости 6,5 млн зл. Тота квота буде презначена на фінансуваня і розвиток публичного транспорту на обшыри 10 ґмін. Од парох років бєщадскы ґміны мали проблем з штораз то меншым чыслом автобусовых переіздів. Проблем збільшыл ся при пандеміі, кєд додатково введено ліміт тых, котры можут находити ся в автобусі. З той причыны бургомайстер Устрик Нижніх Бартош Ромович разом з інчыма самоурядами запропонували створити БЗК. В його склад входят ґміны з бєщадского і ліского повітів та дві ґміны з саноцкого повіту. Ромович пояснил, же получыня в бєщадскым повітом лишают ся такы, якы сут, а в дальшых повітах новы получыня введены будут од квітня/апріля тр. Додал тіж, же разом з початком нового шкільного рока введены будут наступны получыня.

Зложыли сте уж свою деклярацию о способі огріваня будинку?

Іщы піл рока лишыло ся, жебы зложыти деклярацию до Центральной Евіденциі Емісийности Будинків (ЦЕЕБ) о способі огріваня. Зложыти деклярацию зобовязаны сут властителі єднородинных будинків, заряджаючы вельородинныма будинками і властителі незамешканых будинків. Деклярацию мож зложыти інтернетово, безпосередньо вводячы даны до базы ЦЕЕБ, або в традицийній формі. Формуляр, котрый треба выполнити, находит ся на сайті Головного Уряду Будовляного Надзору, котрый єст властительом базы ЦЕЕБ. Выполненый документ треба принести до уряду ґміны, де приналежыт будинок. Термін пересыланя зголошынь ріжнит ся в залежности од даты одданя будинку до хоснуваня. Як єст то перед 30. червця/юнія 2021 рока, то деклярациі треба зложыти до 30. червця/юнія 2022 рока. Як будинок є новшый, та зголошыня треба переслати до 14 дни од урухомліня джерела тепла. Незложыня деклярациі в одповіднім терміні горозит грошовом каром.

фот. Polskie Szlaki