Сумар дня на 11. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 11. серпня/авґуста 2022 р.

Выстава фотоґрафій Петра Басалыґы

В пятницю, 5. серпня/авґуста, в Філиі Публичной Бібліотекы в Жеґєстові одбыл ся вернісаж выставы знимок лемківского фотоґрафіка Петра Басалыґы. То уж такой друга част выставы пн. «Жеґєстів, краса тишом колысана». Выстава буде доступна до кінця вересня/септембра. Петро Басалыґа то особа, яка знимкы Лемковины, а при тым і єй люди вказує од долгых років. Зо своім апаратом был присутный на найважнійшых нашых подіях, зачынаючы од першых Лемківскых Ватр, по шор ініциятив по 1989 р. Од долгых років є так само звязаный з часописом Стоваришыня Лемків – «Бесіда», де все на окладинці находит ся його знимка. Од 2011 р., коли было онсоване наше радийо, автор радо ділит ся своіма фотоґрафіями і з нашом редакцийом.

В Коросні буде улиця Модеста Гумецкого

В Коросні неодолга змінят означыня єдной з улиц (ul. Spółdzielcza) на улицю Модеста Гумецкого. Радны рішыли упамятнити дві персоны міцно звязаны з містом, в тым бывшого лемківского бургомайстра. Рішыня такє было приняте 30. червця/юнія 2022 р., через радных на сесиі Рады Міста. В тот спосіб радны хотят припомнути і упамятнити особу бывшого володаря міста. Треба припомнити, што уж перед роками ріжны середовиска прібували ввести улицю Гумецкого. Уж початком ХХІ столітя Стоваришыня Любителів Коросняньской Землі звернуло ся до Рады Міста надати єдній з улиц міста мено Модеста Гумецкого. Пак по даякым часі безуспішні прібували зас. Подібну ініциятиву піднял в 2011 році Себастиян Дубєль. Радны до того рішыня дозріли аж тепер. Лемківского бургомайстра до той поры в Коросні упамятняла лем таблиця в костелі оо. Капуцинів (котрого будову Гумецкій спілфінансувал).

Волиця має проблем з водом

Недостаток дожджу, котрый спричынят обнижыня выдатности водных джерел, ограничат доступ до воды жытелям русиньского села Волиця, меджелабірского окресу. Жытелі села не годны сут райбати, варити ци мыти ся. Як пояснила старостка Волиці, сельскій водовод збудували самы жытелі в роках 1965-1967. В 2017 р. одновили завдякы дотациі од Природничого Фонду водны джерела. Треба іщы змодернізувати водну трасу в центрі села. Покля дале буде така климатична ситуация, село буде мусіло глядати дальшы джерела воды. Лем без одповідніх дотаций село не є в силі само тото зробити. Проблем з браком воды повторят ся каждого сухого літа, но в тым році єст вынятково планно. Сельскій Уряд забезпечує довозы воды жытелям. В каждым разі такій довіз єст дорогій, більше платит ся за транспорт нич за саму воду. Мало воды єст і в ґаздівскых студнях.