Сумар дня на 11. мая 2020 р.

Приносиме вам сумар медияльной ґрупы ЛЕМ.фм+ на ден 11. мая 2020 р.

Перебудуют державну дорогу но. 28

Державна дорога но. 28, яка веде малопольскым і підкарпатскым воєвідствами, в Ґорлицях чыслит веце як 7 кілометрів. Веде она од Затора через Вадовиці, Рабку, Лиманову, Новый Санч, Ґорлиці, Ясло, Коросно, Санок, Кузьмину, Бірчу і Перемышль. В самых Ґорлицях творит она барз небезпечне місце, де з державном дорогом но. 28 крижуют ся дві воєвідскы дорогы. Жытелі, якы мают хыжы по другій страні рікы Ропа, можут ся достати до міста лем переізджаючы тоту крижівку, зато єст она барз міцно обтяжена. Часто доходит в тым місци до колізий. Інчым проблемом єст примірно брак тротуарів. Єст єднак шанса на перебудову одтинка дорогы но. 28 в Ґорлицях. Дирекция Державных Доріг і Автострад оголосила конкурс оферт на опрацуваня проєкту. Переходы для пішых мают быти заплянуваны од нова, плянуваны сут тіж новы ходникы і роверовы пути. Представникы Ґенеральной Дирекциі Доріг і Автострад ждут тіж рішыня в справі цілой державной дорогы но. 28., жебы могли по ній іздити і тяжшы авта. Працы в Ґорлицях мали бы быти першым етапом той інвестициі.

Будова резервуару Конты-Мысцова

Резервуар Конты-Мысцова має шансу быти зреалізуваный. Двадцет самоурядів лежачых при Вислоці видит потребу збільшыти засобы питной воды. Проблем має розвязати будова резервуару Конты-Мысцова. Єст то єдна з головных задач взятых до увагы в зрыхтуваным властями Пляні Протидіяня Наслідствам Сушы на рокы 2021-2027. Резервуар мал бы не лем быти джерелом питной воды, але тіж забезпечыти околичны міста і села пред заливом. Буде ся він находил на обшыри ясельского повіту і буде обнимал около 400 гектарів в ґміні Крампна і около 40 гектарів в ґміні Новый Змигород. В його середині може ся помістити 65,5 млд літрів воды. В часі залив резервуар буде міг помістити 19,5 млд літрів воды. Проєктова документация мала бы быти опрацувана до кінця 2023 рока, жебы іщы в тым самым році зачали ся будовляны роботы. Завершыня робіт є плянуване на 2027 рік. Інвестиция єднак не може ся зачати, покля не пройде переселіня 158 осіб замельдуваных на обшыри презначеной під чашу резервуару та розваліня около 100 домів. Кошт інвестициі то около 1 млд зл.

Нове задашыня в Маластові

В Маластові є уж місце до ґрілюваня. Задашыня побудували з дерева та каменя. Під ним находит ся уж камінне палениско, єст шырокій тарас і чудовый ландшафт. Має то быти місце, де мож провести свобідный час з добрым ідлом і быти може лежаками. Не єст іщы оголошеный конкурс оферт на арендаря обєкту. Оферту мала бы дополнити іґелітова дорога, літом хоснувана до зъіздів на специяльно пристосуваных до того опонах. Зимом тіж буде мож хоснувати транспортовы конвеєры до сновтубінґу, або вчыти ся ізды на находячій ся близко містній лыжній стациі.

Новый ректор ХБА в Варшаві

Колеґія Електорів Християньской Богословской Академіі в Варшаві выбрала в четвер, 7. мая, нового Ректора Академіі. Остал ним архієпископ проф. др габ. Юрий Паньковсій з Автокефальной Православной Церкви. Ректор-Елект єст выдатным теолоґом, автором вельох науковых публикаций, проректором Християньской Богословской Академіі і кєрівником Православной Секциі. Єдночасно владыка Юрий є Ординарийом Польского Войска і Вроцлавско-Щеціньской Єпархіі. Становиско Ректора Академіі обыйме 1. вересня/септембра 2020 рока. З той нагоды ґратулюєме Владыці і желаме фізичных і духовых сил.