Сумар дня на 11. марця 2025 р.

Приносиме вам сумар медияльной ґрупы ЛЕМ.фм+ на ден 11. марця 2025 р.

30 млн евро дофінансуваня для реґіонів на Словациі 

Аґентура TASR поінформувала, што Міністерство Інвестиций, Реґіонального Розвитку і Інформатизациі Словацкой Республикы в пятницю 7. марця одкрыло можливости позысканя реґіонами понад 30 млн евро дофінансуваня. Села до 1000 жытелів будут мочы ся старати о дофінасуваня в проґрамі «Жыве село», што дає можливости для меншых місцевости, котры скорше мали проблем, жебы позыскати грошы. Вартат підкрислити, што більшіст русиньскых сел має до 1000 жытелів і сут то тзв. малы села. Цілю проґраму єст підпора проєктів тыкаючых розвитку туристикы, охроны культуровой достоменности та розвитку громадяньской інфраструктуры. На реализацию проєктів перезначено понад 4 млн евро. Дальшом формом підпоры в рамках більше як 30-мілийонового проґраму єст одкрытя 21 центрів, цілю якых є спільне выконуваня аґенды самоспсрав. Єст то пілотный проєкт, в рамках котрого підпорюваны будут адміністрацийны, технічны і аналитичны капаціты. Того рока продолжат тіж підпора для найменше розвиненых окресів, на што перезначено 11,5 млн евро. На списку найменше розвиненых окресів находят ся тіж тоты, де прожывают Русины, м.ін. окресы Свидник, Бардиів, Стара Любовня ци Меджелабірці.

Наступны стараня ґміны Мушына, жебы переняти будинок стациі PKP

Ґміна Мушына дальше старат ся переняти будинок стациі PKP, якій вымагат скорой модернізациі. Як передал бургомайстер Мушыны, Ян Ґольба, ґміна уж од 2014 рока піднимат діяня, жебы переняти стацию, котрой стан з рока на рік ся погіршат. Перенятя было уж аж і добесідуване, ґміна отримала 3 млн зл дофінансуваня на реновацию, єднак PKP остаточно ся выцофало, а ґміна стратила фінансуваня. Як подал бургомайстер, ґміна з охотом перейме або одкупит будинок. Власти мают свідоміст, што збільшаюча ся популярніст курорту вяже ся з векшым чыслом подорожуючых до Мушыны, а актуальный будинок стациі не робит доброго вражыня. Ян Ґольба выстосувал писмо до PKP, цілю окрисліня плянів што до будинку, на ясну деклярацию мусит єднак чекати до зобраня Контрольной Рады PKP, котра рішыт о будучым заґаздуваню будинку в Мушыні. Стация в Мушыні єст взята до увагы в анализах інвестицийных потреб PKP, єднак до часу запрезентуваня проґраму спілка не може заняти конкретного становиска.

Едукацийну Стежку вздолж потока Прислопянка

В Новици мают нову атракцию – Едукацийну Стежку вздолж потока Прислопянка. Стежка зачынат ся в Новици, а кінчыт в Ліщынах і разом має 2,5 км долгости. Траса не єст вымагаюча, зато добрі надаст ся тіж для родин з дітми. Пут оточена єст реліктами Карпатской Пущы, понад 200-літніма буками і ялицями. По дорозі находят ся інформацийны таблиці, на котрых мож чытати о богатій природі, єст тіж павілон, де мож собі одпочнути. Додатково в павілоні находит ся ґаблота артефактів переданых професором Анджейом Хлебіцкым, жытельом Ліщын, сут то фосилиі – тых орґанізмів, котры прожывали на тій обшыри в часах прадавного океану. Додатковом атракцийом єст теренова гра «Долина Прислопянкы», яка має форму летучкы і аплікациі, де мож розвязувати загадкы звязаны зо стежком. Нова атракция возникла при спілпрацы Стоваришыня Приятелів Новиці і Надлісництва Лося. Патронами стежкы сут проф. Сімона Коссак і проф. Александер Соколовскій.