Сумар дня на 11. марця 2024 р.

Приносиме вам сумар медияльной ґрупы ЛЕМ.фм+ на ден 11. марця 2024 р.

Новы дороговы інвестициі в ґорлицкым повіті

В середу 6. марця в Повітовым Старостві в Ґорлицях были підписаны догваріня на ремонт мосту в Шымбарку і перебудову перепусту в Ізбах-Баници. Обі задачы сут реализуваны в рамках Урядового Фонду Розвитку Доріг. В рамках першой задачы буде выремонтуваный міст в Шымбарку, якій ся находит на повітовій дорозі 1507К Шымбарк – Быстра – Шальова. Кошт задачы то близко 1 млн 387 тис.злотых, з чого половину покрыє дофінансуваня. В рамках другого дофінансуваня буде перебудуваный перепуст на міст разом з доіздами в місцевостях Ізбы і Бацниця, на повітовій дорозі 1503К Фльоринка Ізбы. Вартіст задачы то близко 2 млн 344 тис. зл, з чого дофінансуваня так само покрыє половину. Термін реализациі обох задач то жолтен/октобер тр.

Привернены трансмісиі богослужынь меншыновых церкви в Польщы

Кінцьом минулого рока дирекция Центра Культуры і Істориі польской державной телевізиі TVP рішыла завісити в 2024 р. трансмісиі богослужынь Церкви зрішеных в Польскій Екуменічній Раді. Канцелярия Православного Митрополиты Варшавского і цілой Польщы подала, што Ґенеральный Директор TVP S.A Томаш Сыґут піднял рішыня, што трансмісиі будут привернены од 1. квітня/апріля тр. в обшыри передвидженій в Порозумліню медже TVP і Польском Екуменічном Радом. Богослужыня Церкви зрішены в Польскій Екуменічній Раді будут наперемінно трансмітуваны од квітня/апріля тр. в кажду неділю в TVP Культура о 8.00 год. рано.

Владыка Юрий ректором Християньской Теолоґічной Академіі на другу канденцию

Як подала Християньска Теолоґічна Академія в Варшаві, 7. марця тр. Колеґія Електорів в тайным голосуваню повірила владыці проф. др. габ. Юрийови (Паньковскому), православному архієпископови вроцлавско-щеціньской єпархіі і ординарийови Польского Войска, функцийу ректора Християньской Теолоґічной Академіі в Варшаві на другу каденцийю 2024-2028. Результатом дотеперішніх прац ректора Християньской Теолоґічной Академіі єст отриманя сильного мандату од Академіцкой Соспільности. Християньска Теолоґічна Академія в Варшаві вчыт на выділах телоґічным і социяльных наук. Місийом теолоґічного выділу єст вчыти теолоґів і будучых духовных на потребы меншыновых церкви в Польщы, в тым православной, протестантской, ци старокатолицкой теолоґіі.

«Поворот Лемків до православія в контексті 100-літя Польской Автокефальной Православной Церкви»

Братство Православной Молодежы Перемышльско-Ґорлицкой Єпархіі поінформувало о дальшій стрічы з циклю «Нашы бесіды». Тым разом темом стрічы буде «Поворот Лемків до православія в контексті 100-літя Польской Автокефальной Православной Церкви». Прелеґентом буде о. Роман Дубец. Стріча одбуде ся онляйн в четвер 14. марця о 20.00 год. Мотузок до стрічы буде поміщеный на фейсбуковым сайті Братства.

Зимовы краєвиды на выставі в Центрі Культуры в Польковицях

Як інформує ґміна Польковиці, до кінця марця в Ґалериі «Na piętrze» в Центрі Культуры в Польковицях мож обзерати выставу пн. «Зимовы Оповісти». То нова експозиция малярства участників працовні «Абакарт» з Любіна. Творці глядали інспірациі серед такых вызначных артистів як Юлиян Фалат, Ян Станіславскій ци Станіслав Іґнатий Віткєвич. Серед зимовых краєвидів сут і такы вказуючы красу осніженых гір. Выставу мож обзерати до кінця того місяця, вступне дармо.