Сумар дня на 11. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 11. лютого/фебруара 2025 р.

В Музею бесідували м.ін. о проблемах в хоснуваню русиньского языка

В минулу пятницю в Словацкым Нацийональным Музею – Музею Русиньской Культуры в Пряшові одбыла ся бесіда пн. Як дале русиньскій язык? з нагоды 30. річниці кодифікациі русиньскойо языка на Словациі. В дискусиі участ взяли головні особы, котры занимают ся языком на професийным рівни. Наперед директорка музею Люба Кральова підкрислила, што кодифікация была найважнійшым ділом, котре повело ся осягнути по 1989 році. Представила тіж біоґрафіі двох головных кодифікаторів – Юрия Панька і Василя Ябура. О правописі бесідувала Кветослава Копорова з Інституту Русиньского Языка і Культуры Пряшівского Університету. До правописовых змін навязал в своім выступліню Петро Медвідь, зас Франтішек Крайняк бесідувал о потребі літургічного русиньского языка. Посліднім прелеґентом был Павел Малецкій, якій оповіл о тым, што повело ся му осягнути в обшыри хоснуваня штучных невровновых сіти і великых языковых моделів з русиньскым языком. Медже рефератами проходила ожывлена дискусия, што лем потвердило потребу подібных бесід.

Новый дотацийный проґрам

Як раз рушыл набір внесків в дотацийным проґрамі урухомленым Інститутом Языковой Ріжнорідности Польской Республикы. Оферты на квоту до 80 тис. зл мож складати до 10 марця тр. Преферуваны сут артистичны, едукацийны діяня, стрічы, розвиток архівалий і репозиторий, творіня едукацийных матриялів до наукы меншыновых языків і локальных языковых одмін та соспільны кампаніі і акций. Оферты складати можут самоурядовы інституциі культуры, позаурядовы орґанізациі, кружкы сельскых ґаздынь та костелы і конфесийнызвязкы. Дотацийный проґрам был урухомленый, жебы підперати і плекати реґіональны і меншыновы языкы – тіж тоты, котры не уст уставово узнаны, діалекты, говіркы, польскій міґовый язык ци міґрансткы языкы, котры будуют языковый краєвид Польщы. Інститут Языковой Ріжнорідности Польской Республикы то нова інституция, покликана до жытя в 2024 році Міністерством Культуры і Нацийональной Спадковины. Головном його задачом має быти популяризуваня знаня о языковій ріжнорідности Польщы.

Конкурс в Кленовій

З нагоды проходячого Рока Русиньского Языка Основна школа з матерьском школом з навчалным языком русиньскым в Кленовій орґанізує цілословацкій літературно-плястичный конкурс для діти і молодежы. Задачом є: або написати свій текст oдносячый ся до темы народных русиньскых приповідок, або зробити малюнок (буд-яком техніком), котрый зілюструє яку-небуд байку з циклю «Русиньскых приповідок», што сут доступны до одслуханя на сайті радия русин.ФМ. Роботы мож присылати од 10. лютого/фебруара аж до 9. червця/юнія. Конкурсовы роботы оцінит жырі в складі: Светлана Цімбакова – учытелька зо школы в Кленовій, Мария Ґірова – русиньска писателька та Іван Ґазій – долгорічный педаґоґ плястичных штук, його творы находят ся в приватных колекциях в ріжных державах. Цілю конкурсу є звернути увагу на народны байкы як богатство нематерияльной спадковины.

Загальнопольска Конференция Методичных Порадників і Візитаторів Навчаня Православной Реліґіі

6. лютого/фебрурара в Центрі Православной Культуры ім. свв. Кірила і Методия в Варшаві одбыла ся XVIII Загальнопольска Конференция Методичных Порадників і Візитаторів Навчаня Православной Реліґіі. Цілю конференциі было підсумувати дотеперішній стан орґанізация наукы православной реліґіі в школах і катехетичных пунктах та спрібувати окрислити спосіб реализациі проґрамовой основы і проґраму вчыня православной реліґіі в світлі послідніх змін і рішынь Міністра Едукациі. На конференциі присутны были представникы Міністерства Нацийональной Едукациі та 23 візитаторів і методичных порадників з цілой Польщы. Модератором конференциі был директор православной митрополиі дс. вчыня реліґіі др Ян Зєнюк.