Сумар дня на 11. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 11. лютого/фебруара 2021 р.

Кампанія «Сме Русины» входит в другій етап

Кінцьом 2020 р. Округлый Стіл Русинів Словациі (ОСРС) во спілпрацы з Русиньском Обродом на Словациі (РОС) одкрыли інформацийну кампанію з назвом «Сме Русины». Ґу тій активности приєднали ся і партнерскы русиньскы орґанізациі з Польщы, Чешской Республикы, Хорвациі, Сербіі, Мадяр ци Румуніі. На Словациі кампанія перешла до другой части. Єй орґанізаторы апеюют, жебы Русины на свою нацийональніст не забыли при ближучым ся списуваню жытелів. До госел кампаніі дошли слова «не забуд» або «і будеме». В першій части кампані представляли ся радше історичны особности, в другій части Русины представляют сучасны особы, котры на Словациі сут знаны з ріжных обшыри культурно-соспільного жытя, і котры ся голосят за Русинів. Окрем Іваны Брілловой, русиньской співачкы знаной і вдяка проґрамови Zem spieva (Земля співат), і Владиміра Чемы, русинського актора і модератора, котры сут головныма тварями і в рамках більбордовой кампаніі, Русинів при списуваню підтримуют і дальшы знаны мена. Серед них сут м.ін. музикант Андрий Кандрач, актор Мартін Мнягончак, співак і редактор русиньского высыланя Штефан Штець, грекокатолицкій єпископ єпархіі в Пармі владыка Мілян Лах і дальшы. До той загальнорусиньской капманіі прилучыли ся Стоваришыня «Руска Бурса» в Ґорлицях і Стоваришыня Лемків.

Шанса на ремонт мосту в Сярах

Згідно з пляном, іщы того рока мали бы ся зачати роботы на воєвідскій дорозі но. 997, яка веде через даякы лемківскы села. Як раз на высокости села Сяры під Ґорлицями, де находит ся міст (в близкій одлеглости од костела), мала бы быти проведена модернізация гевсого обєкту, якій є поставленый над ріком Санківка. Заряд Воєвідскых Доріг як раз тепер рыхтує ся до оферты на переданя даякій фірмі будівляных робіт. Кєд вшытко буде згідно з пляном, то є велика шанса на тото, жебы міст был выремонтуваный іщы в тым році. Перебудова мосту поліпшыт комунікацию в реґіоні. Од долшого часу был він зуженый, так што авта з єдной стороны все мусіли перепущати авта, якы скорше нашли ся на мості.

Нова автострада на Словациі шансом і для Русинів

Пряшівскiй грекокатолицкій архієпископ і митрополита Йоан Бабяк принял в своій резиденциі 5. лютого/фебруара 2021 р. председу Обчаньского Здружыня Автострада на Земплин (OZ Diaľnica na Zemplín) і єдночасно старосту села Башківці, собранецкого окресу, Петра Баторі. Митрополита был інформуваный о основаню здружыня, його замірах і плянах підпорити як найскорше выбудуваня автострады, котра буде спаяла Вышнє Німецкє – державна границя з Украіном, і послідню збудувану част коло Кошыц в селі Бідовці. Бесідувано тіж про сучасну складну економічно-социяльну ситуацию, котра є в селах близко украіньской границі. Брак інфраструктуры не лем не приносит інвесторів до того простору, але спричынят, же одходят і тоты, котры там дотепер были. Митрополита підчеркнул, же треба приняти прородинну політику з боку державы. Архієпископ Бабяк так само повіл, же добудуваня автострады по східню границю з Украіном поможе і реліґійным односинам в рамках структур грекокатолицкой Церкви, кєд «Пряшівска Митрополитна Церков вєдно з Мадярском Грекокатолицком Церквю сут дітми єдной матери – Мукачівской Грекокатолицкой Церкви, котра має центр в Ужгороді».

Маґурскій Нацийональный Парк рыхтує новый проєкт

Маґурскій Нацийональный Парк в 2021 році отримал дофінансуваня на реализацию мікропроєкту пн. «Ровером через погранича – природа, істория і культура на двох колесах». Проєкт нашол ся на списку затвердженых до дофінансуваня в рамках Проґраму Трансграничной Спілпрацы Interreg V-A Польща-Словация 2014-2020. Буде він реализуваный во спілпрацы з ґміном Нижня Полянка на Словациі та ґміном Санкова. В плянах є тіж вознести малы архітектонічны обєкты культуры погранича, а то мініятуры церкви, котры будут поставлены попри фундаментах неістнуючых церкви в Свіржовій Рускій, Жыдівскым, Тихани і Незнайовій. Вздолж інерпретацийной стежкы «Незнайова» выремонтуют придорожны кресты, вымінят іх огороджыня. Окрем выміненого хотят заінсталювати панелі з архівальныма знимками, што представляти будут Незнайову і Свріжову. В заміріню є, жебы стоячы при даным панели (уставленым в выміненых неістнуючых селах), видіти, што можна было обзерати з даного місця. На закінчыня проєкту буде зорґанізуваный біциґльовый райд з Нижньой Полянкы до Бортного.