Сумар дня на 11. липця/юлия 2023 р.

Приносиме вам сумар медияльной ґрупы ЛЕМ.фм+ на ден 11. липця/юлия 2023 р.

Крампняньска Історична Парада – зберали грошы на ратуваня іконостасу в храмі в Святковій Малій

В неділю 9. липця/юлия в Святковій Великій прошла XX Крампняньска Історична Парада, того рока як Дни Памяти Ґенерала Пулаского. Подія орґанізувана єст римокатолицком парохійом з Дошниці, жытелами села Святкова Велика та Фундацийом ім. Ґенерала Пулаского. Ініцияторами акциі сут Барбара і Дариюш Мєльчаркы, котры од понад 20 років анґажуют ся в ратуваня лемківскых церкви. Ювілейна едиция подіі прошла під гослом «Братя Конфедераты – шаблі в рукы». При каждій параді орґанізувана єст колекта на єдну з забытковых деревяных церкви в околиці Крампной. Першых дванадцет едиций подіі прошло в Крампній, де орґанізаторы зберали на ремонт храмів в Котани і Крампній, а кєд святыні не вымагали уж ремонтовых прац, акция перенесла ся до Сватковой, де перше зобраны грошы передали на реновацию церкви в Святковій Великій, а того рока на консервацию іконостасу в храмі в Святковій Малій. Іконостас складат ся з XVII-вічных ікон, не єст він єданк комплетный, в повоєнным бо періоді част ікон была розкраджена. Тепер пріоритетом заанґажуваных в реновацию єст вратуваня находячых ся в святыни ікон, а в плянях находит ся одтворіня бракуючых.

Ретро Потяг в Ґорлицях і Бічы

На желізницьовых стациях в Ґорлицях і Бічы зас вкаже ся Ретро Потяг. Забытковый желізницьовый табір затримат ся в місті світла 24. вересня/септембра. Траса, яку переіхат потяг, веде од Нового Санча, через Ґрибів, Стружы, Ґорлиці Заґужаны, Біч і аж до початковой стациі в Новым Санчы. То понад 100 км подорожы леніями 96 і 108 через історичны фраґменты Ґалицийской Трансверсальной Желізниці, в тым через особливый одтинок в Камянці Великій. Подорож Ретро Потягом то можливіст перевезти ся забытковыма ваґонами з 30. і 60. років XX ст., і провести час з аніматорами в історичных облечынях желізнодорожників і пасажерів зо зламу XIX i XX ст. Участникам переіздів пропонує ся тіж звиджаня Ізбы Традициі Желізнодорожників Новосандецкого Узла, участ в святкуванях 145-літя желізниці на Сандеччыні, промоцийны пікнікы на стациях в Ґрибові і Ґорлицях ци звиджаня середвічной части міста Біч. На каждым етапі о участників дбати будут туристичны провідникы, а місто Ґорлиці і Біч зорґанізували додатковый переізд на трасі Ґорлиці-Біч-Ґорлиці. Білеты на атракцию мож зарезервувати на сайті Малопольскых Пути Желізницьовой Туристикы.

Ци в Креници і Мушыні зас будут одкрыти желізницьовы стациі?

Жытелі Крениці дальше ждут на розвязаня справы желізницьовой стациі. Быти може до кінця того рока поведе ся найти порозумліня медже PKP а властями куторту. Припоминаме, што од долшого часу власти курорту старают ся одкупити будинок желізницьового дворця, котрый од понад декады єст закрытый і нищіє. Як передал представник спілкы PKP, бесіды сут уж на остатній простій до фінализациі. Будинок стациі разом з ділянком, на котрій ся находит, буде переказаный в мішаній формі – по части місто буде мусіло за него заплатити, а по части буде переданый дармо. Окрем самой стациі місто переняло бы тіж три інчы близкы будинкы, єднак тото переданя пройде в рамках окремых процедур в цілости неодплатні на основі переписів о комерциялизациі і реструктуризациі PKP з презначыньом на реализацию власных задач самоурядів в справі транспорту. До закінчыня трансакциі обі страны потрібуют згоды корпорациі і міністра. Подібну пропозицию перенятя закрытой стациі отримали тіж власти міста Мушына, котры подібні як Крениця старали ся одкупити будинок, мали аж і готовый проєкт модернізациі обєкту, єднак по долшых старанях місто мусіло зрезиґнувати. PKP надіє, же того рока поведе ся іщы раз сісти до бесіды з бургомайстром курорту і передати стацию місту.