Сумар дня на 11. липця/юлия 2022 р.

Приносиме вам сумар медияльной ґрупы ЛЕМ.фм+ на ден 11. липця/юлия 2022 р.

«Лаґєр Явожно. Непокараный злочын» – нова публикация Євгена Місіло

Тырват колекта на выданя книжкы «Лаґєр Явожно. Непокараный злочын» авторства Євгена Місіло. Публикация посвячена єст памяти Украінців і Поляків, а тіж Лемків, Шлезаків і Німців вязеных в часі Акциі «Вісла» в Центральным Лаґрі Працы в Явожні. Місіло в своій книжці описує штоденне жытя вязненых там люди, тортуры, голод і понижаня. Як підкрислят, публикацийом хоче вказати, чым был в 1947 р. концентрацийный лаґєр в Явожні, але тіж кым были вязены там особы, одкале походили, як ся называли. В тот спосіб автор старат ся тіж припомнути о оправцях, котры там працували, а котры николи не были осуджены. В книжці находит ся близко 4 тис. біоґрам вязненых в роках 1947-1949, разом з м.ін. фраґментами іх споминів. Ціліст дополнят понад 600 знимок вязненых. Книжка єст уж готова і лем жде на выданя, автора тримают єднак кошты печатаня, зато звертат ся з просьбом о фінансову допомогу. Грошы мож вплачати в кампаніі збераня грошы на сайті zrzutka.pl.

Мікробіота кышок а етнічне походжыня

Дослідникы з Варшавского Медичного Університету, Выділу Біолоґіі Варшавского Університету і Центра Заанґажуваных Досліджынь над Культуровым Спадкобраньом на Выділі «Artes Liberales» ВУ і реализуют проєкт, якій тыкат мікробіоты кышок. Інтересуют іх квестиі біолоґічной і культурово-языковой ріжнорідности і іх звязкы. Досліджыня обнимат баданя чловечого мікробіому кышок в окремых языково ґрупах і вельоязычных ґрупах. Принимают, же окремы культурово і языково ґрупы, зо взгляду на окреміст і дбаня о сохраніня традицийных культуровых практик, мают «здоровійшу» мікробіоту кышок, в результаті чого можут быти ліпшыма донорами для трансплянтациі мікробіоты. Проєкт закладат інновацийне досліджыня культурового дідицтва і схоснуваня його потенциялу на потребы сучасной медицины і медичной біотехнолоґіі. Цілый дослідничый процес складат ся з трьох етапів. В тым, першым етапі просят Лемків (якы мают од 18 до 50 років) выполнити коротку анкєту, што тыкат стилю жытя, достоменности і локального природничого знаня. Деталі і мотузок до анкєты находят ся на нашым портали.

Малопольскы Желізниці на вакацийный період зрыхтували цікаву туристичну оферту пн. «Одкрывай Малопольщу»

Од 1. липця/юлия до 30. вересня/септембра одвиджаючы Малопольщу можут скорыстати зо специяльной оферты «Одкрывай Малопольщу». В рамках промоциі мож купити одповідньо 3- або 7-дньовый білет, котрый дає право до неограниченого чысла переіздів потягами Малопольскых Желізниц. Білет дозвалят на подорож вшыткыма потягами в сіти в другій клясі. Додатково оферта обнимат тіж переізды Автобусовом Довозовом Ленійом. Незалежно од одлеглости кошт 3-дньового білету то 70 зл, а на 7 дни 140 зл.

«Од Русаль до Яна» в Зындрановій

Музей Лемківской Культуры в Зындрановій просит на остатній вікенд липця/юлия на подію «Од Русаль до Яна». По пандемічній перерві акция вертат до традицийной формы. В проґармі подіі находит ся м.ін. одвиджаня музею, выклады, прелекциі, конкурсы і ремісничы показы. Орґанізаторы задбали тіж о музичну оправу – на сцені запрезентуют ся м.ін. ансамблі Серенча ци Гудаци. В неділю одбуде ся служба божа в церкви св. Миколая в Зындрановій.