Сумар дня на 11. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 11. квітня/апріля 2025 р.

«Ластівочка» запрезентувала обряд лемківского парібоцкого вечера

Ближыт ся Великден, а в звязку з тым уж орґанізуваны сут ріжного типу великодні подіі, ярмакы ци варштаты. Такій Великодній Ярмак проходил як раз в минулу суботу 5. квітня/апріля в Шпротаві на Нижнім Шлеску. Специяльным гостьом на подіі был лемківскій Ансамбль Пісні і Танця «Ластівочка» з Пшемкова. Ансамбль запрезентувал премєрове видовиско, котре рыхтуване было цілу зиму. Ластівочка вказала на ним обряд «парібоцкій вечер». Запрезентуваны были пісні, танці і інсценізация лемківского парібоцкого вечера. По Ластівочці на сцені выступували дальшы локальны ансамблі. На ярмаку, клясично, мож было придбати сой вшелеякы выробы ручной роботы ци скоштувати локальне ідло. Окрем того были і великодні варштаты, на котрых мож ся было медже інчыма навчыти малюваня яєц батіковом методом.

На ”Спацері в Хмарах” в Хожові вкажут творы Новосільского

В жолтни/октобрі в місті Хожів одбуде ся выняткова подія – ”Спацер в Хмарах”, орґанізуваный Фундацийом Opus Unicus. Подія зачне ся в Музею Гутництва, а пак перенесе до сусіднього будинку костела імени Ельжбєты в Хожові. В тым неочывидным стильово костелі, де лучат ся неоґотик і романьскій стиль, буде мож видіти неекспонуваны наштоден образы Юрия Новосільского. Творы походят з колекциі Музею Гутництва в Хожові. Окрем того будут презентуваны образы неба авторства Івоны Шока, котра поведе цілу подію. Будут специяльны гості (буде мож дознати ся дашто веце о творчости Новосільского) та концерт джазовой музикы. Орґанізаторы заповідают на тот вечер вельо вынятковых несподіванок. Обовязує скорша резервация місц. Подія одбуде ся завдякы спілпрацы Фундациі Opus Unicus з Євангелицко-Ауґсбуржском Парохійом в Хожові, Музейом Гутництва, Містом Хожів і AC Records. ”Спацер в Хмарах” одбуде ся в середу 8. жолтня/октобра. Початок о год. 18.30.

Варштаты малюваня яєц в Рускій Бурсі в Ґорлицях

Припоминаме што уж позаране, в найближшу неділю, в Рускій Бурсі в Ґорлицях одбудут ся варштаты малюваня яєц. Традицийні стрічаме ся в Квітну Неділю, яка того рока выпадат 13. квітня/апріля. Варштаты зачнут ся о 15.00 год. Орґанізаторы забезпечают материялы – будут на Вас чекати: зварены яйця, фарбы і воск до малюваня. Вчас спільной стрічы продолжана буде традиция рыхтуваня великодніх писанок батіковом методом – розтопленый воск наносит ся на верхню верству яйця, хоснуючы метальовый писалец з головком. Вступне очывидно дармо. Красні просиме!

Варштаты малюваня яєц в сідибі Кружка Стоваришыня Лемків Пшемкові

Варштаты малюваня яєц традицийном батіковом методом будут в тот вікенд і на чужыні – в Пшемкові. На подію просит Кружок Стоваришыня Лемків в Пшемкові. Варштаты одбудут ся в сідибі Кружка в Пшемкові уж заран, в суботу 12. квітня/апріля. Початок о 15.00 год. Вступне платне 10 злотых.