Сумар дня на 11. червця/юнія 2024 р.

Приносиме вам сумар медияльной ґрупы ЛЕМ.фм+ на ден 11. червця/юнія 2024 р.

В Гуменным святкували Ден Русинів Словациі

В неділю 9. червця/юнія в Гуменным прошли центральны святкуваня Дня Русинів Словациі. Зачали ся они ся од святых літургій в грекокатолицкым і православным храмах в Гуменным, пак подія перенесла ся до скансену Выгорлятского Музею, де прошла артистична презентация русиньской штукы з ріжных реґіонів державы. В дальшій части святкувань члены запрошеных ансамблів і участнкикы подіі взяли участ в хороводі через центр міста до памятника Міляна Растіслава Штефаника, словацкого політика і діяча, котрый мал великів вклад в основаня Чехословацкой Республикы в 1918 р. Під памятником делеґаты зложыли вінец, а голос забрал председа Русиньской Оброды на Словациі Мартін Караш. Похід закінчыл ся під Містецкым Центром Культуры, там тіж прошла дальша артистична част святкувань. Серед присутных были представникы локальных власти, котры в своіх выповідях підкрислали, што в Гуменным все буде місце для Русинів. Полну реляцию з подіі можете чытати на нашым сайті. Ден Русинів Словациі припадат на 12. червця/юнія, але святкуваный буде іщы до кінця того тыжня. Вчера Театр Александра Духновича привітал Духновичів Пряшів 2024, в середу фольклорный ансамбль Рутенія разом з Округлым Столом Русинів Словациі просят на святкуваня до Братиславы. Окрема подія орґанізувана єст Русиньском Обродом і містом Меджелабірці і пройде в суботу.

Рыхтуют ся новы атракциі в Бєщадах

Туристичный Центр, прогулька серед корон дерев з видоковом плятформом і 26 узкоторовых роверовых дрезин – то найважнійшы елементы трансграничного проєкту збогачыня Бєщадів. Думкодавцьом проєкту єст Маршалок Владислав Ортиля, реализация пройде завдякы фондам Европейской Уніі та польско-украінской спілпрацы в рамках проґраму Interreg NEXT Polska-Ukraina 2021-2027. По польскій страні за реализацию проєкту одповідат Фундация Бєщадской Лісовой Желізниці, а по украіньскій партнерами сут Івано-Франківска Районна Рада і село Выгода. Окрем головных заложынь проєкт закладат тіж реализацию документального фільму о культуровым богатстві обшыри Східніх Карпат. По украіньскій страні головном інвестицйом буде будова модерной інфраструктуры історичного Дворця Выгоды.

На торы вертат «Włóczykij»

Ближыт ся час вакаций, зато уж тепер Малопольскы Желізиці припоминают, што на торы вернут вакацийны потягы. 25. червця/юнія вертат получыня «Włóczykij» з Ясла до Крениці. Потяг буде ходил аж до кінця вакаций. Так як і в попереднім році – потягы реляциі Ясло-Крениця і Крениця-Мушына-Попрад-Татры будут зо зобом скомунікуваны на стациі Мушына, так што з Ясла мож буде скоро і выгідні доіхати під самы Тарты.

Знаме уж результаты выборів до Eвропарляменту

В неділю 9. червця/юнія прошли выборы до Eвропарляменту. Найбільше голосів отримала Громадяньска Коаліця – 37% голосів, на другым місци партия Право і Справедливіст (36% голосів). На третім місци нашла ся Конфедерация- 12%, пак Третя Дорога коло 7% і Лівиця 6%. Такє розложыня підпоры одповідат приділіню 21 манадатів для ГК, 20 для політиків з ПіС, 6 дла Конфедерациі і по 3 мандаты для Третьой Дорогы і Лівиці. Разом в Европарляменті Польщу репрезентувало буде 53 европослів. Згідні за даныма з Державной Выборчой Комісиі фреквенция того рока вынесла 40%. Серед будучых европослів нашли ся тіж представникы меншын, в тым выбраный уж на другу каденцию Лукаш Когут, котрый діє для узнаня Шлезаків за меншыну.