Сумар дня на 11. червця/юнія 2021 р.

Приносиме вам сумар медияльной ґрупы ЛЕМ.фм+ на ден 11. червця/юнія 2021 р.

Вопрос про вызнаня Русинів як нацийональну меншыну украіньскыма властями

31. мая тр. в Ужгороді одбыла ся стріча членів Комітету з вопросів людскых прав, деокупациі і реінтеґрациі натепер окупуваных територий, нацийональных меншын і медженародных односин з представниками нацийональных меншын закарпатской области Украіны. Як інформувал порталь Mukachevo.net, стріча прошла в рамках приготовліня новой пропозициі закону о нацийональных меншынах на Украіні. На стрічы участны были і предстаникы русиньской меншыны, яка од 2007 р. в закарпатскій области Украіны є вызнана як окрема нацийональна меншына. Голова Народной Рады Русинів Закарпатя, зъєднуючой русиньскы орґанізациі діючы на Украіні, Євген Жупан, на стрічы зас попросил оцінити можливіст вызнати Русинів як окремый нарід на цілодержавным рівни. Дмитро Любинец, голова комітету і єдночасно депутат Верховной Рады Украіны, на звіданя одповіл, што тема є предметом свар украіньскых істориків і культуролоґів, зато як народный депутат не може повісти, же ся ставлят на єдну або другу позицию. До вопросу хоче приступити «выважено». За словами депутата, будут в тій справі робити своі внескы, а то не значыт, же не сут готовы змінити позицию.

Новосільскій на выставі в Радомі

На днес на 18.00 годину заплянувано одкрытя выставы «Портреты і метафоры жытя», тє. першой выставы, яка буде запрезентувана в Каменици Дескурів в Радомі. Буде мож на ній обзерати понад 70 прац з колекциі модерной штукы Музею ім. Яцка Мальчевского в Радомі. Серед презентуваных прац находят ся творы найвызначнійшых артистів творячых по ІІ світовій войні. Окрем прац Едварда Двурніка, Войцєха Фанґора ци Єжы Береся, вказаны будут і творы вызначного лемківского артисты Юрия Новосільского. Выставу буде мож безплатно обзерати до жолтня/октобра тр.

Оперова музика вызвучыт в стаднині в Реґєтові 

Артисты Театру Великого Нацийональной Оперы в Варшаві выступлят на реґєтівскій сцені. О нецілый місяц, 3. липця/юлия, о 20.00 год. на єдиній в світі пленеровій сцені в стаднині кони пройде двогодинный оперовый концерт «Уста молчат, душа співат». Музикы запрезентуют публиці найпопулярнійшы ариі і дуеты, такы як «Велика слава то жарт», «Уста молчат, душа співат» ци «Кєд бы-м был богатый». Вызвучат творы мастерів опереткы, оперы і мюзікалю – Моцарта, Легара, Кальмана ци Штрауса.

Нова атракция на Парковій Горі

Для курортів зачынат ся уж літній сезон, пошырюют они зато свою туристичну оферту і рыхтуют новы атракциі. Єдным з найчастійше одвиджаных туристами креницкых місц єст Паркова Гора. Од червця/юнія того рока на одвиджаючых жде нова атракция, яком єст ведуча на верх теренова гра. Жебы ю пройти треба розвязати загадкы, якых розвязаня пак творит госло. Гру мож выдрукувати з вебсайту PKL, або одобрати в пункті Туристичной Інформациі в Креници і Бібліотеці при нижній стациі колейкы. На тых, котры одшыфруют госло, ждут нагороды, по котры мож ся зголосити до кас на верху Парковой Горы.

Джерело фотоґрафіі: pkl.pl