Сумар дня на 10. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 10. жолтня/октобра 2023 р.

Краків в 100. річницю народин Юрия Новосільского

В Кракові 100. річницю народин Юрия Новосільского упамятнили муральом на стіні єдного з блоків, якій ся находит при ул. Льотничій 22. Представлят він єдну з прац артисты, а зреализували го в рамках ініциятивы «101 Муралів для Кракова». Мураль дає вельо можливости інтерпретациі, додатково на стіні нашол ся тіж код QR, котрый буде переносил обзерачів на сайт посвяченый Новосільскому. Не припадкове єст тіж місце, де возник мураль – в недалекій одлеглости од него находила ся родинна хыжа артисты і його остатня працовня. Офіцияльне одкрытя муралю пройде 24. жолтня/октобра о год. 18.30. В часі стрічы окрем презентациі ініцияторів упамятніня артисты, мож буде познати тіж особы звязаны з жытьом і творчістю Юрия Новосільского. Припоминаме, што в Нацийональный Музею в Кракові іщы до кінця того тыжня мож обзерати выставу посвячену творчости артисты «Новосільскій в сотну річницю народин». Зосерджат ся она на трьох аспектах творчости Новосільского: краєвидах, тілі і абстракциі.

Ніч Бібліотек

В минулый вікенд в цілій Польщы прошла подія «Ніч Бібліотек». Серед многых інституций з цілой державы, котры сут заанґажуваны в промуваня акциі, од парох років находит ся тіж польковицка бібліотека. Тогорічне свято книжок і бібліотек прошло під гослом «Абсурд не чытати». В рамках подіі польковицка бібліотека зрыхтувала богатый плян для шырокого чысла участників – од діти і молодежы по дорослых. В проґрамі нашли ся варштаты і стріча в плянетариюм, дискусия на тему репортажів в рамках стрічы Клюбу Книжкы, кєрмеш книжок та плястичны варштаты для дорослых. Як і в попередніх роках, подія тішыла ся популярністю серед жытелів Польковиц, в звязку з тым містецка бібліотека уж думат о атракциях на будучый рік.

Свято в Клокочові

Грекокатолицкы вірны на Словациі празднували Памят Чудотворной Клокочівской іконы Пресвятой Богородиці, Покровителькы Земплина. З той нагоды в неділю, 8. жолтня/октобра прошол єпархіяльный одпуст Кошыцкой Єпархіі, о чым поінформувал Пресовый Центр Кошыцкой Єпархіі. Праздник присвяченый єст чудотвоній іконі, котра перед веце як 350. роками слезила. Архієрейску літургію правил архієпископ Кірил Басиль, кошыцкій єпарха, разом з ним служыл м.ін. кошыцкій емеритуваный єпарха владыка Мілян Хаутур. В рамках літургіі владыка Кірил уділил званя протоєрея і право носити набедерник і золотый крест отцьови Петрови Чынтальoви, містному парохоци, за його роботу на розиток путницкого місця. На конец служыли іщы Молебны до Клокочівской іконы.

«Еха Карпат – шляком пісен волошской культуры» – вікенд з музиком в Высові

Ґмінный Осередок Культуры в Устю Рускым разом з ґрупом Rozgłos просит на концерт пн. «Еха Карпат – шляком пісен волошской культуры». Подія пройде в найблизшу суботу, 14. жолтня/октобра о 16.00 год. в Центрі Туристичного і Культурового Продукту в Высові. По концерті вшыткы участникы прошены сут на почастунок і гулянку. Подія реализувана єст при спілпрацы з Фундацийом Polna і Стоваришыньом ProCarpathia.