Сумар дня на 10. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 10. вересня/септембра 2024 р.

Уж в тот вікенд пройде фестіваль «Культура Карпат» в Тисні

Ґміна Тисна та Ґмінный Центр Культуры і Еколоґіі в Тисній просят на другу едицию фестівалю «Культура Карпат». Цілю подіі єст промоция карпатской культуры, особливо традиций Лемків і Бойків. В пляні фестівалю находят ся варштаты гончарства, етнокерамікы, карпатской біжутериі, музичны і кулінарны. Участны будут мочы видіти і выставу «Світ Лемків і Бойків» (выдавництва Libra) ци взяти участ в авторскій стрічы з др. Лукашом Байдом автором книжкы «Бєщады. Тото, што найважнійше». Орґанізаторы задбали тіж про музичну оправу. На сцені запрезентуют ся ансамблі презентуючы традицийну музику, ансамбль Лопянка, Лем Мы, Відимо і Оркєстра Святого Миколая. Фестівал пройде 14. вересня/септембра в амфітеатрі в центрі Тисной.

«Рыковиско в Турніцкым 2024»

Кінцьом вересня/септембра в Карпатх пройде подія «Рыковиско в Турніцкым 2024». В часі тридньовой подіі, од 27. до 29. вересня/септембра буде сім тереновых прогульок, котры дозволят участникам познати культурову і природничу спадковину Перемышльского Погіря. Подія зачне ся в пятницю од фотоґрафічной прогулькы «Дикій пленер», де любителі фотоґрафуваня природы будут мочы підшколити ся при досвідченых фотоґрафах. В суботу буде можна взяти участ в духовій екскурсиі з піснями і леґендами, автобусовій прогульці по проєктуваным Турніцкым Парку, краєзнавчым спацері з провідником і природничій выставі по найціннійшых частях пущы. Додатково в суботу орґанізаторы заплянували роверовый райд по Перемышльскым Погірю, доступный він єст в двох вариянтах долгости. Сут тіж атракциі для наймолодшых участників, котры в неділю будут мочы взяти участ в прогульці по лісі. На кажду з прогульок обовязуют скоршы записы. Мотузок до записів та полный плян подіі находят ся на сайті Podkarpackie Trawel.

В Надлісництві Лося станули наступны деревяны різбы

Нова атракция в Надлісництві Лося то ефект проєкту «Другє Жытя Дерева». Автором різб єст Анджей Завадзкій. В тым році до медведя, орлика і совы долучыли різбы волка, другого медведя і двох бобрів. Вшыткы обєкты зрыхтуваны сут том самом техніком різбліня в дереві при схоснуваню механічной пилы. Як передал Надлісничый Надлісництва Лося, дерева з симптомами замераня, котры становили потенцияльне загорожыня, выкорыстано як артистичный материял і так в Долині Лопаціньского станула наступна уж різба брунатного медведя. Волк прикрашат трасу з Высовой до Бліхнаркы, а два бобры находят ся при жеремях на ріці Ропа. В Высовій до новых різб доложено таблиці, так што одвиджаючы можут пошырювати своє знаня на тему загороженых ґатунків звірят і птахів.

Европейскы Дни Спадковины в Шымбарку

Музей Дворы Карвациянів і Ґладышів просит до участи в Европейскых Днях Спадковины. Подія пройде 15. вересня/септембра в Скансені Погіряньского села в Шымбарку. Стріча пройде під гослом «Кулінарны пути Погіря», а участникы окрем самой деґустациі традицийных страв будут мати нагоду познати забыты уж рецептуры. В пляні акциі находят ся тіж кулінарны варштаты ведены Сельскым Кружком Ґаздынь, де охочы дознают ся більше про продукты і складникы та самы зварят просты стравы. Подіі товаришыла буде етноґрафічна прелекция про давну погіряньску кухню та звиджаня з провідником бывшой пекарні в хыжы з Мощениці. Подія зачне ся о 11.00 год. в скансені, вступ платный 2 зл.